quinta-feira, 2 de agosto de 2018

Programa Auditória Sosiál Importante


DILI, (TATOLI) – Ministru Reforma Lejislativa no Asuntu Parlamentár, Fídelis Magalhas, hateten auditória sosiál ne’ebé halo hosi Organizasaun Naun Govermentál Timor-Leste (FONGTIL) ba programa governu importante.

“Auditória iha kontestu haree duni programa sira ne’ebé governu implementa ne’e fó  benefisiu duni ba populasaun no sente sai nain ba programa ne’e ka la’eʺ, ministru hatutan hafoin halo diskusaun ho reprejentante sosiedade sivíl iha Palásiu Governu, ohin.

Governu sei hametin liután kooperasaun ho sosiadade sivíl hodi kontinua implementa programa ne’e.

ʺGovernu ida ne’e sei haree modelu di’ak hodi kopera ho organizasaun sosiadade sivíl iha programa auditória sosial ne’eʺ, realsa.

Kordenadór ba konsellu Diretiva Rede Auditória Sosial FONGTIL, Dinorah Granadeiro, hateten sorumutu introdús servisu auditória sosiál ne’ebé sosiadade sivíl implementa.

ʺPrograma importante haat maka ita asina ho governu hanesan saúde, infra-estrutura, agrikultura ho edukasaun, tanba setór haat ne’e sai xave importante ba dezenvolvimentuʺ, dehan.

Tuir nia FONGTIL sai fonte informasaun hodi relata preokupasaun no kesar povu nian ba governu relasiona ho implementasaun projetu iha baze.

Rekomendasaun balun maka rede ne’e hato’o ona ba Governu dahituk hanesan ema ho defisiente matan, tilun, fíziku no seluktán labele asesu edukasaun ho di’ak.

Alende ne’e mós preokupasaun seluk ne’ebé liga ho área agrikultura, saúde no infraestutura.

Entretantu, Governu estabelese ona nota entendimentu iha tempu Governu dahituk.

Jornalista: Agapito dos Santos | Editora: Rita Almeida

Imajen: Ministru Reforma Lejislativa no Asuntu Parlamentár, Fídelis Magalhas. Foto Egas Cristovao

Sem comentários: