PR Aseita Nomea Kandidatu Membru Governu

DILI, (TATOLI) - Prezidente-Repúblika (PR), Francisco Guterres Lú Olo, aseita ona atu nomea kandidatu membru Governu na’in tolu iha tempu besik.

Informasaun ne’e hato’o hosi Primeiru-Ministru, Taur Matan Ruak, ba jornalista sira iha Palásiu Prezidente Nicolau Lobato, Bairru Pité, Dili, kinta ne’e, hafoin hala’o enkontru regulár ho Xefe-Estadu Lú Olo.

Xefe governu ne’e esplika, kandidatu membru Governu ne’ebé atu toma pose maka hanesan Samuel Marçal okupa kargu Ministru Planeamentu Investimentu Estratéjiku troka Kay-Rala Xanana Gusmão, Alfredo Pires okupa Ministru Petróleu no Minerais no Rogério Mendonça okupa Vise Ministru Agrikultura no Peskas.

“Prezidente-Repúblika kompromete atu fó tomada pose ba ha’u nia ministru sira. Loron tomada pose Prezidente maka sei marka,” PM Taur Matan Ruak esplika tan.

Enkuantu ba membru governu na’in 9 seluk, Primeiru Ministru, dehan, seidauk iha solusaun. Ba kandidatu membru Governu na’in sia (9) ne’ebé antes ne’e Prezidente-Repúblika kestiona tanba deskonfia involve iha partisipasaun ekonomia.

Hatán kona-ba rezignasaun Prezidente Aliansa Mudansa ba Progresu, Kay Rala Xanana Gusmão nu’udar membru governu iha governu da-8 nian, Taur Matan Ruak dehan, respeita desizaun Kay-Rala Xanana Gusmão tanba nia (Xanana) konsentra liu-ba asuntu fronteira terrestre, Marítima no Greater Sunrise.

 “Labele depende ba ema ida no ida ne’e forma ida aprendizajen ba joven sira. Aban, bainrua ka tinan lima oin mai dala ruma ha’u maka sai tan, fó fatin ba sira seluk sa’e. Ne’e oportunidade ba jerasaun sira atu troka malu,” Eis Komandante Gerrilleiru ne’e esklarese.

Jornalista: Xisto Freitas | Editór: Manuel Pinto

Imajen: Primeiru-Ministru, Taur Matan Ruak, bainhira hasoru malu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pité. Foto António Goncalves