sexta-feira, 19 de outubro de 2018

PN prevé millaun US$2.6 sosa kareta foun ba deputadu

PARTILHAR

Parlamentu Nasionál (PN) V lejislatura prevé millaun US$2,6 iha planu Orsamentu Jeral Estadu tinan 2019, atu sosa kareta foun ba deputadu 65 iha V lejislatura nian.

Liu hosi diskusaun orsamentu privativu Parlamentu Nasionál nian iha plenária estraordinaria Kinta (18/10/2018) ne’e, Vise Xefi bankada FRETILIN, Francisco Miranda Branco sujere ba meja PN, atu sosa karreta ne’ebé reprezenta duni povu, no marka Nisan Navara ne’ebé ho folin merkadu RP $380.000.000, apropriadu liu, duke sosa prado ne’ebé ho folin dollar amerkanu $63.000.

“Parlamentu Nasionál bele hili karreta ne’ebé reprezenta povu duni, pickup Nisan Navara, lahatene nia folin ho Pajero export ne’e hira? se Nisan Navara mak nia folin hanesan, ami hanoin ida ne’e di’ak ida, ita país Timor-Leste ne’ebé 40% sei moris ho malnutrisaun, kuaze 50% husi povu ne’ebé ita reprezenta moris iha liñe de pobreza nia okos, hanoin ami nia proposta ida ne’e iha duni fatin, tanba dignidade deputadu nia reflete ba servisu, la’os reflete ba karreta ne’ebé ita iha”,hateten deputadu opozisaun FRETILIN ne’e.

Hatan ba preokupasaun ne’e, Primeira Vise Prezidenti Parlamentu Nasionál, Maria Angelina Samento, relata, V lejislatura tau ona planu atu sosa karreta ba deputadu sira iha OJE 2019, tanba nessesidade, maibe sei buka karreta ne’ebé ho folin barratu liu, kompara ho karreta prado ne’ebé antes ne’e sai polémika ba públiku.

“Iha kapital menor iha duni prevé verba ida atu sosa veíkulus ba 65 deputadus V eljislatura nian, tanba problema karreta III lejislatura ne’ebé maske iha ona esforsu husi PN, maibe to’o agora seidauk iha solusaun, no difikuldade ne’ebé deputadu sira hasoru mak laiha transporte ba deputadu sira, atu fasilita hala’o servisu iha Parlamentu no mós halo fiskalizasaun, entaun tinan oin 2019 iha duni verbas atu aloka ba sosa karreta ba deputadu sira, maibe tipu ka marka karreta ne’e lahanesan ona ho ida ne’ebé mak públiku preokupa, no presu ba ida ne’e mós sei ki’ikliu, husi ida ne’ebé mak sai hanesan preokupasaun públiku nian durante ne’e”,esplika deputada Maria Angelina Sarmento.

Deputada PLP ne’e esklarese tan, PN planeia ona atu sosa karreta ne’ebé ho marka Pajero, nune’e bele garante viajen deputadu nian ba halo fiskalizasaun to’o área remota sira.

 “Tuir pedidu ka proposta ne’ebé iha, marka la’os Prado, maibe Pajero, ida ne’ebé mak iha kondisaun maiz ou menus iha trasaun atu bele fasilita deputadu sira bele halo viajen ba to’o suku ka área remota sira ne’ebé mak tenke uza duni trasaun, tanba kondisaun Estrada ne’ebé la favorese ba ita atu halo viajen, hanesan fatin sira ne’ebé iha difikuldade ba Estrada”,tenik Angelina.

Vise Prezidenti PN ne’e konfirma tan, durante PN halo ona esfosu atu bele dada hikas karreta prado ne’ebé utilza husi eis deputadu sira III lejislatura nian, maibe seidauk konsege.

Tanba ne’e, deputada ne’e informa, PN sei kontinua buka mekanizmu atu kolabora ho eis deputadu sira, hodi entrega karreta refere, atu fasilita deputadu V lejisltura hala’o servisu hodi hein to’o V lejislatura sosa karreta foun, hafoin halo lelaun hikas ba públiku atu hetan reseitas ba kofre estadu.

“Kona-ba karreta prado, iha esforsu balun ne’ebé mak Parlamentu halo ona, hanesan husu kolaborasaun deputadu sira III lejislatura nian, atu bele entrega fila fali karreta prado, nune’e bele fasilita deputadu sira V lejislatura nian hodi hala’o servisu to’o sira hetan karreta foun iha 2019, no bainhira deputadu sira iha ona karreta foun, karreta tuan ne’e sei kontinua halo leilaun ba públiku, no bainhira halo leilaun osan ida ne’e sei tama fali ba kofre Estadu, ne’e parte ida husi ita-nia reseitas, tanba karreta sira ne’e nia kondisaun mak la permite ona atu deputadu sira  ne’e kontinua uza ba halo fiskalizasaun to’o iha baze, liu-liu karreta sira ne’ebé deputadu sira uluk uza ne’e, sira la hela metin iha Díli, maibe sira ba mai suku sira ne’e maka’as teb-tebes, no karreta sira ne’e nia kondisaun ne’e ladun favorese ona, ho ida ne’e mak mekanizmu ne’ebé halo mak, deputadu III lejislatura entrega tiha mai, hodi fasilita lai deputadu V lejislatura, to’o V lejislatura nia orsamentu aprova, halo akizisaun ba sosa karreta foun, hafoin karreta foun iha ona mak bele halo leilaun ba públiku, ida ne’e mak meius ne’ebé PN halo atu solusiona problema konaba karreta ne’e,” klarifika Maria Angelina Sarmento.

Antes ne’e, Prezidenti PN Arão Noe Amaral deklara, Parlamentu sei uza meius husu apoia husi Polísia Nasionál Timor-Leste (PNTL), bainhira eis deputadu sira lakoi kolabora ho Parlamentu Nasionál.

Enkuantu, karreta Prado ne’ebé sosa iha III lejislatura ho folin dollar amerikanu $63.000 no fó lelaun ba eis deputadu sira III lejislatura ho de’it montante dollar amerikanu $8.000 no kuaze karreta 50 liu mak troka ona xapa matríkula Parlamentu nian ba privadu. Say


GMN TV | Grupo Média Nacional
PARTILHAR

Author: verified_user

Publicação luso-timorense sem fins lucrativos

0 comentários: