Ramos Horta Ko’alia Asuntu Tolu Ho Prezidente Repúblika

DILI, (TATOLI) – Premiadu Nobel  ba Pás, José Ramos Horta, ko’alia asuntu tolu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, kinta ne’e.

Asuntu tolu ne’e, ida kona-ba lori mensajen Prezidente Repúblika ba Roma atu konvida Amu Papa vizita Timor. Troka imprensaun kona-ba konvite ne’ebé Prezidente halo ona ba Sua Santidade Papa Francisco, atu mai vizita Timor-Leste.

“Tanba ha’u iha konvite ida atu ba Roma hosi Senadu Italianu, entaun ha’u koko to’ok bainhira ba Roma, ha’u konvida Senadu Italianu bele lori mensajen ruma hosi Prezidente Repúblika ba Sua Santidade para bele mai vizita Tmor”, Horta haktuir ba jornalista sira hafoin sorumutu.

Nia dehan Prezidente Repúblika konkorda atu entrega mensajen ruma ba nia lori ba Vatikanu, maibé  la garante Papa atu simu nia, tanba Papa okupadu ba asuntu barak.

Asuntu seluk, Horta informa tinan oin (1999), tinan 20 referendu, tanba ne’e nia fó hanoin ba Xefe Estadu atu prepara kondisaun mínimu fulan neen ka tinan ida hodi konvida bainaka importante sira hosi estranjeiru.

“Ita hakarak konvida Xefe Estadu hosi rai liur, mínimu tenke prepara fulan neen ka tinan ida antes. Ha’u la’ós imperadór ka Xefe Estadu ruma maibé ha’u simu konvite dala barak no kuandu konvite to’o iha ha’u nia liman fulan tolu de’it no fulan neen dalaruma ha’u la simu, tanba tarde demais atu planeia, satan konvida xefe estadu mai hosi liur atu mai ka ema personalidade boot ruma”, nia esplika.

Ne’e duni, nia sujere ba Prezidente Repúblika atu aproveita tinan 2019 halo eventu oi-oin para tau fila fali mapa Timor iha mundu liuhusi formasaun turizmu no biban ne’e Prezidente Repúblika konkorda asuntu refere—sei ko’alia ho Governu  atu tau iha orsamentu.

Asuntu datoluk, Eis Xefe Estadu ne’e tenik kona-ba ASEAN, tanba ema barak iha preokupasaun liu-liu to’o agora seidauk iha atividade ne’ebé intense ka forte para aselera Timor nia adezaun ba ASEAN.

Nia hateten Prezidente Repúblika mós preokupadu asuntu ne’e, tanba ne’e sei konsulta ho Governu atu haree saida maka presiza atu halo tan.

“Ministru Negósiu Estranjeiru, Dionísio Babo, ema ida ne’ebé matenek, hakarak book án liu-tan para Timor nia adezaun ne’e akontese iha tinan ida ka rua nia laran. Tanba dezde tinan 2011 liu-ba, Timor hatama aplikasaun maibé to’o agora laiha desizaun”, Horta haklaken.

Jornalista: Xisto Freitas | Editora: Rita Almeida

Imajen: Premiadu Nobel Dame 1996, José Manuel Ramos Horta. Imajen António Goncalves