Timoroan tenke tane aas nasionalismu hodi bele dezenvolve

DILI - Timor Leste ne’e sosa ho ema nia ran no ruin  hodi hetan nia indepedensia sai nasaun ida. Povu Timor Leste hamrik ho nasionalismu hodi defende rai Timor hahu hosi tempu kolonialismu to’o iha invasaun Indonesia. Ho espiritu nasinalismu ne’e tenki tane aas hodi dudu dezenvolvimentu ne’e ba futuru.  “Timor Leste hetan ona nia indepedensia iha eleisaun 1999 tanba ne’e ita labele selebra ho kualidade ida nafatin no nafatin.

Ita lor-loron mak koalia susar hela deit, ita lor-loron husu hela deit ba iha governu  maibe nudar timoroan tenke iha nasionalismu oinsa bele servisu hodi ajuda Governu hodi bele dudu Timor Leste nia dezenvolvimentu tuir nasaun sira seluk” dehan emprezaria Timoroan Claricia Lay ba BT iha nia servisu fatin, Hudi-laran semana kotuk. Tuir nia katak agora laos ona tempu ba iha timoroan sira atu tane liman nafatin ba iha governu atu hatan ba iha kabun maibe oinsa mak ajuda servisu hamutuk ho governu hodi lori Timor Leste ba oin.

“Hau hateten ida ne’e tanba bainhira iha tinan 1975 timoroan la tane lima ba ema ida hodi kontra kolonialista sira no invasaun Indonesia mai Timor Leste ita la tane lima ba iha ema ida ita ho nasionalismu hodi hasoru sira tan ne’e agora ita ukun an tenke iha nasionalismu nafatin hodi servisu ajuda dezenvolvimentu TL”,  katak Claricia. Nia afirma katak Timor Leste iha potensial boot tebes iha area lubuk ida mak hanesan peskas, agrikultura, kustura, kuluner, turismu maibe timoroan lakohi atu dezenvolve area hirak ne’e tanba area  hirak ne’e importante tebes ba iha Timor Leste nia futuru.

Tuir Claricia nia hare katak durante ne’e sidadaun sira nia nasionalismu ba iha dezenvolvimentu kiik tebes tanba sira badinas liu ba iha ritual cultural, rohani no politika. “Hau nia hare ba sidadaun sira nia badinas iha ritual cultural no rohani sira badinas la halimar nomos ba iha politika maibe ba buat ida atu servisu nian hau hare ladun iha tanba oras servisu nian sei falun an. Lolos ida ne’e labele ona mosu iha ita nia nasaun tanba ita halo komparasaun ba iha nasaun seluk ema nia avansa liu tiha ona tan ne’e ita hotu tenke servisu oinsa bele dudu ita nia dezenvolvimentu TL ba oin”, dehan Claricia.

Tan ne’e nia husu ba iha governu atu bele apoiu timoroan sira atu oinsa bele hafanu timoroan sira bele iha komitmentu nasionalismu hodi dudu dezenvolvimentu Timor Leste lao ba oin. “ Tan ne’e governu tenke iha politika ida laos atu fo osan maibe oinsa bele fasilita timoroan sira atu halo impresta ho lukru ne’ebe mak kiik no liu hosi ministeriu nebe mak apoiu treinamentu liu hosi NGO sira kapasita sidadaun rai laran atu oinsa bele dezenvolve setor sira ne’ebe mak importante iha Timor Leste hanesan agrikultura, turismu, nomos seluk-seluk tan,” nia husu.

Nia afirma katak iha loron ida Timor Leste nia mina sei tun no sei maran no iha jerasaun futuru labele terus governu agora tenke hakbiit sidadaun sira hodi alkansa potensial sira ne’ebe mak Timor Leste iha. “ Hau hakarak iha futuru mai bele avansa diak liu tan no sira labele terus nafatin hanesan ita.” Tan ne’e Clarisa ekoraga timoroan sira atu bele iha hanoin diak hodi servisu ba iha nasaunTL.

“Hau ekoraga ba timoroan sira tanba loron la hein ita no lao beibeik, idade mos ba beibeik, tempu mos ba beibeik tanba sira ne’ebe mak uluk defende Timor Leste mate tanba sira hanoin ita lori nasaun ne’e diak liu tan ne’e ita mos tenke hanoin mos ba iha ita nia oan sira nia futuru oin mai, tenke hahu agora hodi servisu ba nasaun no ba familia,” nia enkoraje. Nia mos informa katak sai sidadaun nebe diak tenke ser hadomi nia nasaun, tenke ser iha nasionalismu, komitmentu servisu ba nasaun maske ho kapasidade minimu, tenke badinas nomos honestidade. (BT)

Business Timor - Pedro