DESKONFIA UZA OSAN ESTADU SOSA RAI, JORGE TEME: “MEDIA POLITIZA LIU”

Eis Ministru Estatal (MAE), aktual deputadu Frente Mudança, Jorge Teme kondena media, tanba dehan deskonfia uza osan Estadu nian hodi sosa rai ba interese privadu.

Iha loron 08 fulan Setembru tinan 2014, loron transaksaun “Fa’an no Sosa Rai” iha Aldeia Avansa Perumnas, Suco Bairo Pite, Postu Administrativu Dom Aleixo, Munisípiu Dili. Nune’e Osan Estadu ho montante 25 mil Dolares Americanus ne’ebé maka, Jorge Teme, deskonfia utiliza hodi hola rai no deskonfia osan husi Governu nomos doadores maibe ikus mai rai ne’e hanesan propriedade Privadu ninian fali.

Kontroversial ba rai ne’e kontinua la’o tanba osan ne’ebe maka hetan rekoñesementu husi Governu nomos parlamento Nasional, tamba rai refere uza naran (Nain) Luzerio Donzilio Junior da Conceição Teme (Jorge Teme nia oan) maibe asinadu husi nia aman Jorge Teme.

Relasiona ho asuntu ne’e, bainhira Jornalista sira koko konfirma ba membru deputadu Jorge teme ne’ebe maka hola rai,maibe nia parte la fo komentariu ruma konaba kazu refere, no hasai fali liafuan ne’ebe maka ses husi kazu ne’e no hasai liafuan seluk kondena media katak, Jornalista politiza demais liu.

Nia dehan, bazeia ba konstituisaun RDTL artigo 41 defini konaba liberdade emprensa, servisu media hanesan servisu profisional ne’ebe maka dezimina informasaun ba publiku konaba situasaun saida deit maka akontese. Maibe liafuan politiza la merese atu koalia ba media tanba media laos partidu politiku ida nian, tanba prinsipiu media firmeza iha independente, transparante no neutraliadade.

“Imi (Media-red) politiza liu,”dehan Jorge Teme hodi fila kotuk ba dadaun tama ba sede Frente Mudanca, Vila-Verde, Sabadu (23/05).

Iha fatin hanesan, rai nain Jacob da Costa de Jesus haktuir, partisipasaun iha prosesu negosiasaun hola rai Perumnas, Jorge Teme akompaña Madre nain rua ho lori kedas osan ho montante 25 Mil Dolares Amerikanu.

“Prosesu hola rai, partisipasaun iha momentu ne’e nia (Jorge Teme) sei Ministru ESTATAL hela akompaña madre nain rua, I nia mai lori kedan osan, ha’u nia rai atu sosa, ha’u pronto tanba ha’u nia rai ha’u atu fa’an ho montante 25 mil dolar”afirma rai nain ba jornalista iha hela fatin, Sabado (23/05).

Kontroversial mosu iha prosesu hola rai maka, rai ne’ebe maka hola tau nia oan nia naran maibe aman (Teme ) maka asina laos oan maka asina.

“Nia dehan hola rai, atas nama nia oan nia naran, ok nia maka asina ,nia lori osan mai hau fa’an ha’u nia rai.” Jacob Haktuir

Antes ne’e, Ministeriu Solidaridade Sosial (MSS) urjentemente tenke ajuda labarik orfonato nain 30 husi Asosiasaun do Menino Jesus (AMJ) iha Permunas, Dili, tanba hela fatin refere Eis Ministru ESTATAL, actual Membru deputado husi partido Frente Mudansa Jorge da Concenção Teme oferese ba AMJ maibe ikus mai hasai madre sira sem razaun klaru ba publiku.

Tanba ne’e Kinta (21/05) MSS ho parte polisia evakua labarik orfonato ba fatin seluk, tanba eis ministru Teme ne’ebe nudar uma nain duni sai madre ho labarik orfonato sira.

Responsavel AMJ, Madre Marisa Fernandes hateten, hela fatin AMJ ne’e rasik oferese husi Jorge Teme iha tinan 2014 atu nune’e nia parte bele uza hodi haree labarik orfonatu sira iha fatin refere. No Madre Marisa ho nia kolega madre seluk maka hela iha fatin ne’e hodi hala’o misaun.

Maibe, Madre Marisa hatete foin dadauk ne’e ,Jorge Teme ba haruka nia parte sai husi uma ne’e ho razaun madre sira laiha responsabilidade hodi haree didiak labarik sira ne’e.

“Madre hatan ba Teme dehan, responsavel ba labarik sira dader ho meudia to’o kalan ha’u fó han, sira hot-hotu durante ne’e iha ami nain rua nia liman. Atu fó han ba sira ami hatene,” dehan Madre Marisa, ba jornalista, iha Perumnas Kinta (22/5).

Madre Marisa hatete nia rona husi doador balun katak osan ne’ebe maka eis ministru MAE uza hodi sosa rai ne’e mai husi doador nian ne’ebe fo ba governu hodi bele azuda labarik orfonatu sira iha AMJ.

“Nia (Teme) ajuda ami momentu (ami) hasoru difikuldade. Nia buka rai (hodi) sosa ho uma, maibé to’o ikus mai doador sira dehan ba madre katak, osan ne’ebé Teme hodi sosa rai no uma ne’e fó husi governu no doador sira, tanba labarik sira orfonatu AMJ sira. Maibé Teme halo hanesan projetu ba nia interese, ida ne’e mak ha’u kontra,” tenik Madre Marisa.

Nia hatete, Jorge Teme mai fofoun insulta ho lia fuan tolok hasoru madre. Maibe, Madre Marisa dehan nia entrega deit lia fuan Teme nian ba Maromak.eby

Jornal Nacional