CPLP tenki harii dalan úniku hodi fasilita negósiu sira - responsável timoroan

CPLP tenki hili modelu ida "janela úniku", hanesan ho ida ne'ebé maka hala'o hosi Asosiasaun hosi Nasaun sira Sudeste Aziátiku (ASEAN), hodi fasilita komérsiu no halo lalais jestaun ba troka komersiál sira, defende ona hosi responsável timoroan ida.

Eis-ministra hosi Finansa no responsável atuál hosi Komisaun Reforma Fiskál (CRF) Timor-Leste nian, Fernanda Borges, hatete ba Lusa katak projetu ida hanesan ne'e "hanesan resposta prátika ida hodi insentiva importasaun no esportasaun entre nasaun sira lian portugés nian".

"Ha'u konsidera katak iha oportunidade ida hala'o inisiativu ne'e iha nasaun sira CPLP nian", nia hatete ba Lusa bainhira hakotu konferénsia ida iha Díli, iha ámbitu hosi enkontru daruak hosi ministru sira Komérsiu luzófonu sira nian.

Janela úniku hosi ASEAN liga no integra balkaun úniku nasionál sira hosi estadu membru sira hosi organizasaun rejionál, no nia objetivu "halo movimentasaun lalais hosi merkadoria iha kontestu hosi integrasaun ekonómiku boot nia laran" iha Asosiasaun hosi Nasaun sira Sudeste Aziátiku nian.

Estadu membru ida-idak hosi ASEAN avansa daudaun ho Janela Úniku Nasionál sira, ne'ebé hakarak halo efisiente liu sistema sira hosi jestaun komérsiu internu no esternu nian.

Janela nasionál ne'e permiti, entre aspetu sira seluk, pontu úniku ida ba aprezentasaun hosi informasaun sira no libertasaun lalais no fasil ba karga sira.

Iha kazu Timor-Leste nian, Governu aprova ona iha fulan ne'e kriasaun hosi Komisaun Nasionál ba Fasilitasaun hosi Komérsiu (CONFAC), "fórum konsultivu idaba promosaun diálogu entre Ezekutivu, setór privadu no interveniente sira seluk ne'ebé relasionadu iha área komérsiu nian".

Tuir esplikasaun hosi komunikadu ida ezekutivu nian, objetivu maka "akonsella Governu kona-bá dalan sira hodi la halo burokrasia ba importasaun no esportasaun, no kordena serbisu tomak governamentál ne'ebé maka envolve iha prosesu ne'e".

Burokrasia sai nafatin hanesan obstákulu ida ba komérsiu esternu iha Timor-Leste.

Fernanda Borges hatete katak Governu timoroan hakarak aumenta kordenasaun entre Ministériu sira, departamentu sira no ajénsia sira ne'ebé envolve iha importasaun no esportasaun, hodi buka "sistema sira ne'ebé efisiente liu no kapasitasaun ba ema sira hodi prodús tempu entrada no saída hosi sasán sira".

SAPO TL ho Lusa