Caucus no STAE Enkoraja Feto Partisipa Efetivu iha Prosesu Eleitorál

Fundação Caucus Feto iha Politika (Caucus) servisu hamutuk ho Sekretariadu Tékniku ba Administrasaun Eleitorál (STAE) organiza enkontru Koordenasaun Nasionál hodi koalia kona-ba oinsá atu enkoraja feto hodi partisipa efetivu liután iha prosesu eleitorál nian no kna’ar no responsabilidade STAE iha Eleisaun. Enkontru ne’e halao iha Salaun Enkontru STAE, Caicoli, Dili.

 Objetivu husi enkontru ne’e mak atu haforsa partisipasaun feto iha eleisaun suku no hasa’e kuinesimentu kona-ba importansia atu partisipa iha prosesu eleitoral. Sorumutu ne’e STAE mós foti parte atu esplika kona-ba kna’ar no responsabilidade STAE nian iha Eleisaun.

 “Ha’u apresia tebes ho inisiativu hodi realiza enkontru ida ne’e tamba enkontru ne’e bele fó oportunidade mai ita atu rona ideas ou hanoin husi parte hotu atu atinji metas ou objetivu sira ne’ebé mak STAE iha liuliu oinsa atu enkoraja feto sira atu hola parte iha prosesu eleitorál,” dehan  Diretór Jeral STAE, Sr. Acilino Manuel Branco, iha Salaun Enkontru STAE Caicoli, Dili, Kinta (02 Juñu 2016).

 Atu bele asegura partisipasaun feto ativu liutan iha eleisaun sira tuir mai liu-liu elisaun suku ne’ebé tuir planu sei halao iha tinan ne’e, enkontru refere diskute faze ba faze kona-ba mekanismu hodi enkoraja no motiva partisipasauns feto nian iha prosesu eleitorál sira.

Diretora Caucus, Sr. Paula Corte-Real e Araujo, hateten katak, “Ita nia Lei Suku Foun foin lalais aprova ona husi Parlamentu Nasional, agora iha ne’e ita atu haree oinsa Caucus hanesan organizasaun feto ida ho ninia parseiru sira hanesan: Fundasaun Patria, Asosiasaun Feto sira no seluk tan atu servisu no kolabora hamutuk ho orgaun elitoral sira atu bele maximiza partisipasaun feto iha eleisaun suku, elisaun jeral ne’ebe sei akontese iha tinan oin no elisaun municipal.”

Fó komentariu mós ba sorumutu ne’e, Xefe Ekipa USAID nia projetu Ba Distrito, Sra. Carolyn Tanner, husi Counterpart International, hatete katak, “Enkontru ohin loron ne’ebé lidera husi Caucus no STAE hatudu katak kolaborasaun ne’ebé forte entre sosiedade sivíl no Governu hanesan meius importante ida atu fahe ideia sira no maximiza involvimentu ne’ebé hanesan/igual atu hetan partisipasaun husi sidadaun hotu inklui feto iha prosesu eleitorál.”

 Sorumutu loron ida ne’e, ne’ebé loke husi Diretor Jeral STAE, Sr. Acilino Manuel Branco,  partisipa móa husi reprezentante sira husi: Secretaria Estado ba Apoiu no Promosaun Sosiu Ekonomika Feto, USAID nia Projetu Ba Distrito, Steering Committee ba Enkuadramentu Lojiku Feto iha Politika, Asosiasaun Feto Munisípiu Dili, Fundasaun Patria, Rede Feto, organizasaun sosiedade sivil sira no mós funsionariu husi STAE no Caucus sira.

 Reuniaun Koordenasaun ho Entidade Jestaun Eleitorál ba dahuluk ne’e parte ida husi ativiadade seluk ne’ebe Caucus sei implementa, hanesan: Semináriu Advokasia Nasionál / Mejaredonda ida kona-ba Feto iha Polítika,  enkoraja partisipasaun feto liuhusi kampaña iha rádiu no televizaun, no sei prepara relatóriu ida kona-ba Caucus nia observasaun ba partisipasaun feto nian durante iha prosesu eleisaun suku nian. Atividade sira ne’e suporta husi USAID nia projetu Ba Distrito, ne’ebé hetan apoiu jenerozu husi povu Amerikanu liuhusi Ajénsia Dezenvolvimentu Internasionál Estadus Unidus (USAID). (*)

Matadalan