Deskonfia Bolseiru Ida Hili Hahan Foer Iha Moçambique

DILI – Reprezentante povu iha uma fukun Parlamentu Nasional (PN) preokupa servisu Governu nian liu-liu Ministeriu Edukasaun (ME), hodi fo bolsu estudu ba Timor oan sira eskola iha nasaun Moçambique, maibe bolseiru nee ohin loron deside –an hili foer.

Informasaun nee fo sai Deputadu Bankada Fretilin, Manuel Castro liu husi sesaun plenaria iha uma fukun Parlamentu Nasional (PN), Dili, Segunda (10/10/2016).

Ita nia bolseiru ida agora dadauk nia iha moçambique nia osan bolsu estudu nee laiha, foin dadauk hau simu informasaun husi membru Governu ida hatete katak nia iha neeba nee osan laiha ona, nia ba hili foer han, entaun governu halo nusa,” dehan Manuel Castro.

Manuel Castro haktuir, Governu hatene haruka ema depois osan labele haruka ba, tanba oras nee bolseiru iha Mocambique, husu atu ME konfirma iha Mocambique iha duni bolseiru ruma ka lae. Se iha neeba karik halo favor ursententemente tenke responsabiliza.

Iha sorin seluk, Deputada husi Komisaun F trata asuntu Edukasaun no saude, Ilda Maria da Conceição dehan, tuir informasaun neebe mak sira hetan katak, laos estudante ida Rita, nia (Rita) nee uluk polisia nia oan ida neebe hetan bolsu estudu ba iha neeba, kaben tiha ho Angolanu ida no agora iha oan barak iha neeba.

Maibe ohin Deputadu Castro foti nee estudante ida seluk naran Januario nee mak iha informasaun dehan katak nia lahetan bolsu estudu ninia, neebe nia kala dezaraska hela atu han no hemu,” dehan  Ilda Maria.

Relasiona ho asuntu nee, Ministru Edukasaun (ME), Antonio da Conceição dehan, bolseirus iha neeba nee iha Embaixada i bolseirus kuandu hili atu ba ema nia rain, tenke preparadu atu hasoru situasaun saida deit mak iha neeba. Informasaun kompletu iha STL Jornal no STL Web, edisaun Kuarta (12/10/2016). Raimundo S. Fraga

Suara Timor Lorosae