KOMUNIDADE TIBAR REKLAMA, PONTE CPLP HO AEROPORTU COMORO

Prezidenti Repúlika (PR) Taur Matan Ruak, Domingo (16/10) kontinua fali hala’o Programa Diálogu Komunitáriu, iha Suku Tibar, Postu Administrativu Bazartete, Munisípiu Liquiça.

Diálogu komunitária Xefi Estadu Taur Matan Ruak ne’e, kontinuasaun husi vizita Suku sira ne’ebé mak hala’o tiha ona desde Taur Matan Ruak eleitu sai Prezidenti Repúblika (PR) iha eleisaun prezidensiál iha tinan 2012.

Iha Suku Tibar, komunidade reklama konaba ponte Comoro aktual Ponte CPLP no mós  Aeroportu Internasional Prezidenti Nicolau Lobato Comoro.

Komunidade husu katak, Ponte Comoro ho Aeroportu Internasionál Nicolau Lobato ne’e partense ba Munisípiu Liquiça nian, tanba baliza antigamente ne’e iha Ponte Comoro nian aktual ponte CPLP.

“Ha’u kestiona liu kona-ba baliza entre baliza Munisípiu Díli ho Liquiça, tanba iha tempu avo sira nian, baliza entre Liquiça ho Díli ne’e   iha ponte Comoro. Ha’u ko’alia liu kona-ba kampu aviasaun Nicolau Lobato ne’e, iha nia impostu bele hateten katak, ba de’it nasionál, tanba ne’e ami atu husu, sé bele karik aloka netik osan 25% ka 50% para ami bele dezenvolve ami nia Munisípiu, tanba Aeroportu ne’e ami nian,” deklara komunidade Oracio da Coneceição Araújo ba PR Taur Matan Ruak, liu husi diálogu komunitáriu iha Suku Tibar, Segunda (17/10).

Alénde reklama konaba Ponte Comoro ho Aeroportu, Oracio da Conceição mós, hato’o ninia preokupasaun konaba baliza entre Munisípiu ho Munisípiu, Suku ho Suku. Tanba durante ne’e, seidauk iha definisaun klaru konaba baliza terrestres entre suku ho suku no Munisípiu ho Munisípiu.

Alénde ne’e, nia mós kestiona kona-ba dezenvolvimentu iha Suku, iha Suku refere difikuldade liu kona-ba mota, tanba iha tempu udan, mota sempre ameasa povu.

“Iha programa PNDS ne’e, ha’u kestiona liu kona-ba bee moos, tanba iha bailoron no tempu udan, ami triste liu kona-ba bee,” katak nia.

Hatán ba preokupasaun ne’e, Prezidenti Repúblika (PR), Taur Matan Ruak dehan, iha fatin barak ema husu kona-ba baliza Suku ho Suku.

“Mas ba ha’u hateten ba sira katak, agora ita preokupa lai ho baliza entre Australia ho Indonesia,” katak Taur Matan Ruak.

Kona-ba impostu husi Aeroportu Internasionál Nicilau Lobato ne’e, PR Taur Matan Ruak dehan, impostu ne’e tenki tama ba Governu sentral.

“Impostu dadaun ne’e, rekoella impostu, sei iha Governu sentral, impostu hot-hotu iha Governu sentral,” katak Taur Matan Ruak.

Kona-ba mota ameasa komunidade ne’e, PR Taur Matan Ruak dehan, bareira mota ne’ebé loke iha fat-fatin, iha problema, tanba mota komesa sobu rai estratéjiku sira.

“Iha tempu naruk solusaun saida mak ita tenki fó, ida ne’e problema ida ne’ebé ita tenki hanoin,” Xefi Estadu ne’e esklarese.

Eis Jeneral ho fitun rua ne’e haktuir katak, preokupasaun sira ne’e iha Timor laran tomak, tanba povu nia natar no toos, mota komesa sobu hotu ona.

“Kada tinan ita nia Governu sempre fó atensaun, mas mota kontinua sobu nafatin,” tenik Taur Matan Ruak.

Kona-ba bee ne’e, Taur Matan Ruak dehan, bee moos ne’e la’os problema iha Suku Tibar de’it, maibé iha Díli de’it mós difikuldade ba bee.

Iha okaziaun ne’e Taur Matan Ruak mós husu ba komunidade sira atu kontribui ba estabilidade no paz hodi bele garante ba eleisaun Suku ne’ebé sei akontese iha 29 de Outubru 2016 no eleisaun Prezidensial no Parlamentar iha 2017 mai.

“Iha fulan ida ne’e ita sei iha eleisaun Suku, ita husu ba Moramak atu ita nia rai kontinua hakmatek, tinan oin mós iha eleisaun prezidensial no parlamentar,” katak Taur Matan Ruak.

Xefi Estadu ne’e fó ezemplu katak, paz hanesan aifunan ne’ebé familia foin kuda, tanba ne’e estabilidade no paz sei nurak, presiza Timoroan hotu nia kontribuisaun.

“Paz no estabilidade hanesan aifunan ne’ebé familia tomak iha Timor presiza tau matan. Ha’u fiar povu iha Timor laran tomak hakarak hakmatek, Timor oan hotu fó kontribuisaun tanba estabilidade no paz iha ita nia rai bele metin maibé nurak los,” Taur Matan Ruak fundamenta.

Aproveita oportunidade ne’e, Taur Matan Ruak mós husu ba povu iha Suku Tibar atu hamutuk servisu maka’as dala ida tan, hodi luta ba moris di’ak.

“Ha’u mai atu husu imi nia tulun atu ita hotu la’o hamutuk dala ida tan ba buka moris di’ak, tanba ukun-an ita hetan ona maibé moris di’ak seida’uk hetan,” katak Xefi Estadu ne’e.

PR Taur Matan Ruak mós husu ba povu atu hadia sira nia ekonómia, kuidadu sira nia saúde, no haruka oan sira ba eskola, tanba povu nia luta ne’e sei saugati de’it, kuandu oan sira la eskola, no la hetan moris di’ak.cos

Jornal Nacional