Morál Sívika Bele Hadi’a Profesionalismu F-FDTL ho PNTL

DILI, (ANTIL) – Tuir deputadu Cesar Valenti de Jesus Pilotu, atu redus problema indisiplina iha instituisaun defeza (F-FDTL) ho seguransa (PNTL) hodi sai professionál tenke hahú kuda morál sívika ho militár iha instituisaun rua ne’e tanba, ohin loron númeru kazu indisiplinár kontinua aumenta.

“Bainhira instituisaun sira transforma ona morál sívika, juventude sira ne’ebé integra iha instituisaun bele komunga ona mentalidade atu servisu estadu”, Pilotu komenta ba ANTIL iha Parlamentu Nasionál, foin lalais ne’e.

Morál sívika labele implementa de’it iha instrusaun maibé tenke rutina iha instituisaun nia laran pelumenus kada semana. “Ohin loron ita haree ita nia militár sira nia hahalok dok teb-tebes ona hosi prinsípiu militár atu salva povu iha vida no nasaun iha perigu”, Pilotu reforsa.

Instituisaun rua atu halo mudansa ba paradigma ne’ebé ohin loron akontese liu ona, presiza mós produz livru bolsu ne’ebé haktuir kona-ba direitu no dever militár ho PNTL hodi fó hanoin hikas sira nafatin bainhira sente la’o sala tanba, durante ne’e númeru indisiplina kontinua sa’e maka’as, atendimentu públiku povu kontinua kestiona.

Nu’udar reprejentante povu sei fó hanoin liuhosi diskusaun Orsamentu Jerál Estadu atu ministériu relevante toma konsiderasaun. Maske antes ne’e Pilotu levanta ona iha tempu governu bloku koligasaun. (jornalista: Manuel Pinto; editora: Rita Almeida)

Foto: Deputadu, Cesar Valenti de Jesus Pilotu