Artista
Timor-oan, Maria Vitória (MarVi), ne’ebé durante fulan rua resin tuir
kompetisaun múzika Dangdut iha Indonézia aban kalan Kinta-Feira (05/01/2017),
óras tuku neen (18:00) sei halo konseru múzika iha Centro Convenção Díli (CCD).
Informasaun
ne’e hato’o hosi Sekretáriu Estadu Juventude Desportu (SEJD), Leovirgilio
Hornai hamutuk ho artista nasionál sira liu hosi konferénsia emprensa ne’ebé
hala’o iha edifísiu SEJD, Lesidere Díli, Kuarta (04/01/2017).
“Iha
kalan tuku neen (18:00) óras Timor-Leste sei iha konsertu agradesimentu ida
hosi MarVi ba povu Timor-Leste, liu-liu povu sira ne’ebé iha Díli no mós ba
autoridade sira Governu, Parlamentu Nasionál, sivil no militar nian ne’ebé maka
fó apoiu moral no mós sira seluk tan ba artista MarVi ho nia ekipa,” dehan
SEJD, Leovirgilio Hornai iha biban ne’e.
Iha
fatin hanesan, Xefe Komisaun Organizadora ba atividade ne’e, artista Eusmenio
Borges haktuir kona-ba atividade ne’ebé sei hala’o relasiona ho prezensa MarVia
nian. Kona-ba konsertu ne’ebé hala’o iha CCD, Eusmenio informa katak, komisaun
prepara ona palku iha CCD no MarVi sei kanta múzika rua (2) no akompaña hosi
artista nasionál sira seluk ne’ebé involve, inklui resprezentante DAA2 na’in
lima seluk hanesan, Gerson Oliveira, Dora Bria, Marco Araújo, Jery Kong, no
Lola Cancio.
Alén
de ne’e, sei partisipa mós artista na’in haat (4) seluk ne’ebé foin la-lais
reprezenta TL ba kompete iha kompetisaun “Bintang Radio televise ASEAN” iha
Indonézia ne’ebé reprezentante hosi Timor-Leste okupa iha sengungu lugar (2°).
Tuir
informasaun ne’ebé Matadalan online asesu katak, iha múzika rua (2) importante
maka Marvi sei kanta iha konsertu ne’e maka hanesan, múzika “Liku-Liku ho Jera”
no posibilidade nia bele kanta tan múzika balun ho lian tétum.
Kona-ba
aranjamentu ba banda ne’ebé sei toka ba konsertu ne’e sei toka hosi tokadór
timor-oan sira, ka artista nasionál sira.
Entretantu,
partisipasaun MarVi nian durante fulan hirak nia laran iha DAA2 hanesan
orguillu bo’ot ba Timor-Leste, liu-liu artista timor-oan sira tanba maske foin
primeira vez partisipa iha eventu ne’e, MarVi konsege kompete ho nasaun seluk
no okupa iha kuartu (4°) lugar. No konsege halakon reprezentante hosi nasaun
haat (4) seluk hanesan, hosi Malázia, Singapura, Brunei Darusalam no Thailand,
hafoin lakon ho reprezentante uma na’in Indonézia. (Jon)
Matadalan
Sem comentários:
Enviar um comentário