DOM VIRGÍLIO: DAME TENKI HARII IHA LIA LOS NO JUSTISA NIA LETEN

Bispu Diocese Díli, Dom Virgílio do Carmo da Silva, SDB, hateten atu hametin paz no dame iha Nasaun no familia nia laran tenki harii liu husi ai-rin hat nia leten, verdade, justisa, liberdade no domin.

“Jesus Kristu nu’udar mega projetu ba dame nian, maibé dame ne’e tenki hari’i liu husi ai rin hat nia leten mak hanesan, verdade, justisa, liberdade no domin e ita labele hakilar no koalia konaba dame se laiha lialos, justisa, liberdade no domin, tanba dame lao’s harii iha anin nia leten deit,” esplika Dom Virgilio do Carmo da Silva SDB, iha ninia homilia wainhira prezidi misa tinan foun iha loron 01 fulan Janeiru 2017, iha Igreja Nossa Senhora Maria Auxiliadora, Comoro-Díli, Domingo.

Selebrasaun misa ne’e hahú iha tuku 08:00 dadersan ne’ebé partisipa husi antigus alunus salesianos, sarani Parokia Maria Auxiliadora inklui padre no madres sira.

Dom Virgilio hatutan katak, tinan foun ne’e fanun no fo hanoin ba sarani tomak hodi hakribi violensia ho nune’e bele tau interese povu, Nasaun no kreda nian iha leten.

“Fo hanoin mos mai ita katak atu sai povu ne’ebé ida deit tenki hakribi violensia no harahun tia rama ambon hodi husik interese pesoal, grupu, artemarsias iha kotuk hodi hahu tinan foun ho interese Nasaun, kreda no povu nian, tanba loron 1 fulan Janeiro lao’s loron tinan foun deit, maibé igreja mos komemora loron solenidade mãe de deus no loron mundial da paz ho pontu importante balun hodi marka esperansa foun no halo resolusaun e komprimisiu ba ema idak-idak nia moris,”haklaken Dom Virgilio.

Tanba ne’e atu hametin dame ne’ebé los tenki hasai kilat no rama ambon, tanba dame hanesan obra sosial ne’ebé ninia impaktu lao’s ba ema ida deit, maibé ba ema hotu.

“Dame mai husi ema idak-idak atu manifesta iha nia vida sosial, vida politik ho nune’e atu hametin dame ne’ebé los tenki hasai no halot kilat no rama ambon, tanba lao’s ho violensia no forsa mak ita halakon violensia no justisa maibé ho domin no hahalok ne’ebé diak, tanba dame hanesan obra sosial ida ne’ebé ninia impaktu ba ema hotu,”haklean Bispo Díli.

Nune’e iha selebrasaun missa ba tinan foun ne’e Bispo Virgilio haktuir katak, viveirus ba paz no dame tenki hetan nia abut iha ema idak-idak nia fuan, tanba fuan mak sai hanesan depozitu no odamatan hodi hakoi no hakiak odiu.

“Fuan mak sai hanesan depozitu no odamatan hodi hakoi no hakiak odiu no hahalok a’at, tanba husi fuan mak hahalok no hanoin a’at mosu ho nune’e atu promove violensia lao’s hatudu ba ema, maibé hatudu ba ita an rasik tanba abut husi viveirus paz nian iha ema idak-idak nia fuan ho nune’e tenki husu ba ida-idak nia an saida mak ha’u halo ona, no saida mak ha’u tenki halo tan hodi kontribui ba paz no dame iha Nasaun Timor Leste ne’ebé sei alergia nafatin ba paz,”sublinha Dom Virgilio.

Tanba ne’e espera katak, ho tinan foun ne’e fanun sarani hotu hodi hader no husu ba idak-idak nia an oinsa mak atu mellora liutan dezenvolvimentu iha Nasaun Timor Lorosa’e.

“Tinan foun ne’e fanun sarani hotu hodi hader no husu ba ida-idak nia an oinsa mak atu mellora liu tan dezenvolvimentu iha Nasaun Timor Lorosa’e liu husi fo kontribuisaun ba paz,” Bispu Díli.

Entretantu hafoin remata missa ne’ebé refere, sarani sira nomos padres no madres sira akompaña Dom Virgílio do Carmo da Silva, SDB, ba hemu kafe hamutuk.ita

Jornal Nacional