Julgamentu ba portugés sira ne'ebé iha Díli liu tinan rua resin hahú iha 28 Fevereiru

Julgamentu ba kaben-na'in sidadaun portugés ne'ebé la sai hosi Timor-Leste iha tinan rua nia laran, tanba akuzasaun naok, brankeamentu kapital sira no falsifikasaun dokumentu, hahú iha loron 28 Fevereiru, hatete hosi Tribunal Díli nian.

Loron hahú julgamentu ba Tiago ho Fong Fong Guerra, ne'ebé iha sesaun daruak marka ba loron 14 Marsu, konfirma tiha ona iha audiénsia badak ida iha Tribunal Distrital Díli (TDD) nian ne'ebé prezidi hosi juíza Jacinta da Costa iha loron-tersa.

"Iha parte balun ami senti satisfeitu tanba tribunal adia ona inísiu julgamentu nian, konsidera katak sei iha prazu hodi aprezenta kontestasaun no mós sasin sira no dalan seluk prova nian, halo nune'e, tuir direitu prosesual tomak hodi ami bele hatudu ami nia inosénsia no hamoos ami nia naran", Tiago Guerra hatete ba Lusa.

"Maibé, ami labele husik atu hatete katak kestaun ne'e, ne'ebé lori ona tinan rua, hapara hela ami nia moris no mós ami nia família sira nia moris, liuliu ami nia oan sira nia moris", nia hatutan.

Kaben-na'in nia advogadu ida simu nafatin notifikasaun katak julgamentu hahú iha loron 03 Janeiru maibé notifikasaun ne'e la kumpri tuir lei ne'ebé determina katak arguidu sira tenki simu notifikasaun rasik.

Portugés na'in rua - ne'ebé iha fulan-Dezembru nia rohan iha asesu ba prosesu kompletu - ba TDD no nune'e simu rasik notifikasaun iha loron 28 Dezembru ka tempu ne'ebé la to'o hodi halo julgamentu iha loron 03 Janeiru.

Iha audiénsia badak iha loron-tersa juíza hato'o hahú julgamentu iha loron 28 Fevereiru, loron ne'ebé aseita hosi defeza no Ministériu Públiku.

"La fásil hasoru suspeita ba sala, rekoñese katak prinsípiu boot maka prezunsaun inosénsia nian hanesan mós ne'ebé invoka foin lalais ne'e hosi primeiru-ministru timoroan", hatutan hosi Guerra.

"Ami hakarak fiar iha julgamentu ida justu ho igualdade arma sira entre akuzasaun ho defeza. Ami hein, liuliu, atu halo justisa ida", nia hatutan mós.

Iha kauza maka akuzasaun ba krimi sira naok, brankeamentu kapital sira ho falsifikasaun dokumentu.

Iha akuzasaun, MP konsidera arguidu sira hanesan responsável ba autoria material iha konkursu real no iha asaun sira hosi krimi tolu ne'e.

Hanesan prova, aleinde dokumentu sira ne'ebé hetan iha prosesu, MP timoroan aprezenta sasin na'in haat, inklui eis-visi-ministru Finansa Rui Hanjam, funsionáriu na'in rua hosi Ministériu Finansa no atual ministra Finansa, Santina Cardoso.

Prokuradora defende manutensaun hosi medida koasaun nian, hodi konsidera to'o "bainhira sei hametin pretestu sira ne'ebé determina aplikasaun" hosi medida sira ne'e.

Husu mós atu arguidu sira hetan kondenasaun hodi selu kompensasaun sivil ida ho folin ne'ebé hatete hanesan lakon hosi Estadu timoroan nian, ne'ebé iha total 859.706,30 dolar.

Iha kazu krimi naok no brankeamentu kapital nian, kastigu máximu sira ne'ebé hatete iha Kódigu Penal timoroan nian maka kadeia tinan 12 no ba krimi falsifikasaun dokumentu sira kastigu máximu maka multa ka kadeia tinan tolu.

MP rona tiha ona Tiago Guerra ho nia feen iha fulan-Juñu liubá, hafoin hetan kaer durante fulan 20 resin, no kuaze tinan rua labele sai hosi nasaun no ho Termu Identidade no Rezidénsia nian.

Tiago Guerra hetan kaer ba interogatóriu iha loron 18 Outubru 2014, hela loron tolu iha eskuadra polísia nian iha Kaikoli no iha loron 21 fulan-Outubru hatán iha Tribunal Díli nian, bainhira juís hatama nia ba prizaun preventivu, hodi tama iha kadeia Bekora, ne'ebé hela to'o loron 16 fulan-Juñu tinan liubá.

Hahú loron ne'ebá, hamutuk ho nia feen, maka iha Termu Identidade no Rezidénsia nian (TIR) no labele sai hosi nasaun.

SAPO TL ho Lusa