LORON MATE NICOLAU LOBATO SAI LORON HEROI NASIONAL

Prezidenti partidu Frente Revolucionario do Timor-Leste Independenti (FRETILIN), Francisco Guterres “Lu-Olo” informa, Parlamentu Nasional (PN) eskoella 31 Dezembru sai hanesan loron herois nasional, tanba iha loron 31 Dezembru 1975 Indonesia latan (hamate) saudozu Nicolau Lobato nia isin ba rai Timor nia leten.

“Ha’u hanoin ohin (31 Dezembru 2016, red) Estadu organiza serimonia dia dos herois nasional, ne’e ha’u hanoin iha ninia razaun rasik katak iha loron ida ne’e duni maka saudozu Nicolau Lobato ninia isin Indonesia sira latan iha rai ida ne’e nia leten, nia raan nakfakar hamutuk ho assuwa’in sira seluk, tanba ne’e maka Parlamentu Nasional muda fali lei, envez de dia 7 Dezembru tau fila-fali ba dia 31 Dezembru para atu sai hanesan loron dos Herois Nasional ninian,” hateten Prezidenti Partidu FRETILIN Francisco Guterres ‘Lu-Olo’ ba jornalista sira hafoin partisipa komemorasaun loron nasional herois ninian, iha Rotunda Nicolau Lobato, Comoro-Díli, Sábadu (31/12/2016).

Ho ida ne’e Lu-Olo esplika, hotu-hotu mai hamutuk iha fatin ida ne’e atu komemora loron herois nasional hodi hola nafatin inspirasaun, forsa no korajen husi saudozu ou herois sira hotu, liu-liu Nicolau Lobato para Timoroan hotu hamutuk hodi hadia rai Timor.

“Ha’u hanoin loron ida ohin (31/12/2016) hanesan loron ida ne’ebé ita bele hola inspirasaun boot teb-tebes, liu-liu ba juventudi sira iha Timor-Leste para bele hapara violénsia ne’ebé maka sira halo iha ita nia rai, hodi hatutan ho vontade tomak, ho konsénsia konabá saida maka heroi sira ne’e husik hela mai ita para atu bele garante paz no estabilidade iha ita nia rai para bele hadia povu nia moris,” dehan Lu-Olo.

Nia akresenta katak, konabá ejijensia povu ninian ba restus mortais saudozu Nicolau Lobato nian ne’e, Estadu sei iha tempu rasik hodi informa, pesoalmente labele adianta buat ida konabá ne’e, maibé Nicolau Lobato moris nafatin iha ita hotu nia fuan.

Entretantu tuir alin husi saudozu Nicolau Lobato, Rogério Lobato hateten, sente katak loron 31 Dezembru ne’e hanesan rekoñesimentu formal ida ba Nicolau Lobato hanesan Prezidenti ida ne’ebé mate iha kampu de batalla no sira hotu ne’ebé tuir ninia mehi, ninia ezemplu, fakar-ran no fó sira nia vida ba rai ida ne’e, ne’e signifika ema rihun ne’ebé mate hamutuk ho nia no ne’e herois hotu.

“Governu sempre halo esforsu dezde primeiru Governu konstitusionál to’o Governu sira tuir mai ne’e atu buka Prezidenti Nicolau Lobato nia ruin, klaru que agora Timor-Leste ho Indonesia iha relasaun Estadu, entaun saida maka Governu Timor-Leste bele kontinua kontaktu nafatin ho Estadu Indonesia atu hetan rezolusaun ida ba problema ida ne’e, para itabele konvense Estadu Indonesia atu hatudu fatin sira hakoi prezidenti Nicolau Lobato nia ruin para itabele rekopera restus mortais hodi hakoi ho dignidade, tanba nia merese hetan fatin ida hodi hatoba-an ba,” dehan Rogério Lobato.

Iha komemorasaun loron herois nasional (31/12/2016) ne’e partisipa husi membru Parlamentu Nasional balun, membru Ministériu Negósius Estranjeirus no Kooperasaun, Prezidenti Partidu FRETILIN, Francisco Guterres “Lu-Olo”, fundador FRETILIN Rogério Lobato, membru F-FDTL, Falur Rate La’ek, membru PNTL balun, Ministériu Comérçio Industria no Ambiente (MCIA), membru Ministériu Edukasaun balun.ves

Jornal Nacional