quarta-feira, 4 de janeiro de 2017

Iha Timor, MarVi Hela Iha Otél Novo Turismo

PARTILHAR
Hafoin tuir kompetisaun múzika dangdut iha Indonézia durante fulan rua resin, iha loron Kinta (05/01/2017), Artista Timor-oan Maria Vitória (MarVi) fila hikas mai Timor-Leste (TL).

Iha Timor-Leste, komisaun organizadora prepara fatin ba MarVi, liu-liu komisaun deside MarVi sei hela iha ótel Novo Turismo Lesidere, Díli durante nia atividade. Rajaun MarVi hela iha ótel tanba atu prevene ema labele gangu MarVi nia atividade.

“Ótel ne’ebé MarVi ho nia ekipa sei hela maka Novo Turismo. Ami serbisu hamutuk ho SEJD sei lori MarVi ba iha ótel, maibé intensaun la’os atu haruka MarVi toba iha ótel, maibé nia sei hela iha ne’ebá tanba intensaun sé MarVi ba hela iha uma ita hotu ba iha ne’ebá bele gangu nia atividade no tempu ba nia la iha,” dehan Xefe Komisaun Organizadora ba atividade MarVi nian durante iha Timor-Leste, Eusmenio Borges.

Eusmenio informa katak, durante loron rua nia laran, komisaun sei halo atividade sosial lori MarVi la’o. No tuir tradisaun sira sei lori MarVi ba uma, no prepara fatin ida ba nia.

Entretantu, aban MarVi sei to’o iha aeroprto internacional Prezidente Nicolau Lobato Díli iha oras tuku ida (13:00) meiudia, no sei simu ho atividade karavana.

Ho partisipasaun MarVi nian durante fulan hirak nia laran iha Dangdut Academy Asia 2 (DAA2) hanesan orguillu bo’ot ba Timor-Leste, liu-liu artista timor-oan sira tanba maske foin primeira vez partisipa iha eventu ne’e, MarVi konsege kompete ho nasaun seluk no okupa iha kuartu (4°) lugar.

No konsege halakon reprezentante hosi nasaun haat (4) seluk hanesan, hosi Malázia, Singapura, Brunei Darusalam no Thailand, hafoin lakon ho reprezentante uma na’in Indonézia. (Jon)

Matadalan
PARTILHAR

Author: verified_user

Publicação luso-timorense sem fins lucrativos

0 comentários: