Eleisaun Jeral 2017 Partidu 25 Mak Sei Kompete

DILI  – Prezidente Komisaun Nasional Eleisaun (CNE), Alcino Barris dehan, provizoriamente iha tinan 2017 partidu politiku hamutuk 25 mak sei kompete iha eleisaun jeral.

Ami (CNE) konta provizoriamente hamutuk lolos nee partidu 25 mak atu bele konkore,” dehan Prezidente Komisaun Nasional Eleisaun (CNE), Alcino Barris ba jornalista sira wainhira remata enkontru hamutuk ho partidu politiku sira iha edifisiu CNE, Caicoli-Dili, Sesta (13/01/2017).

Prezidente nee haktuir, partidu 25 tanba partidu sira nee mak oras nee iha ona kondisaun atu bele konkore. Maibe nee mos seidauk hatene bele mos menus husi ida nee. Alcino sublina, iha eleisaun parlamentar, oportunidade diak ba partidu politiku sira bele hili opsaun rua importante, ida antes halo koligasaun no seluk depois koligasaun.

Alcino afirma, antes eleisaun nee sira buka kadeira. Se ida nee mak akontese numeru partidu politiku bele menus tan. Konaba partidu sira simu subsidiu hanesan tinan 2012 nee laiha ona.

Iha fatin hanesan Prezidente Interinu partidu PUDD, Julio Salsinha dehan, partidu harii laos atu buka osan, maibe harii tanba nasaun, atu husu osan estadu nee fo ka lafo ba sira laiha problema.

Nunee mos, Vice Ministro Administrasaun Estatal (MAE) Tomas Cabral dehan, lei partidu politiku foun hatete partidu politiku sira neebe mak atu kompete iha eleisaun sei lahetan osan husi estadu antes eleisaun, depois eleisaun hotu mak sira hetan, maibe konta votus liu husi rezultadu eleisaun. Informasaun kompletu iha STL Jornal no STL Web, edisaun Sabado (14/1/2017). Raimundo S. Fraga

Suara Timor Lorosae