sexta-feira, 6 de janeiro de 2017

PM: Governu Fo Garantia ba Emprestimu Bankariu Hodi bele Apoia Setor Privadu

PARTILHAR
DILI (ANTIL) – Timor-Leste iha osan barak mak depozita iha banku maibe seidauk konsege halo buat ida, Primeiro-ministro, Rui Maria de Araújo informa asuntu ne’e iha enkontru informal neb’e halao ho media iha Palásiu do Governu.

“Dadus husi banku sentral hatudu hatudu katak ita iha USD$ 600 milloens iha banku, maibé la investe iha ekonomia”, tenik PM.

Nia hatutan, Banku dehan osan ami la investe iha ekonomia tamba risku bot, risku mai husi ema neb’e la konsege halo negósiu diak, entaun osan ida neb’e banku fó kreditu, ema balun la konsege devolve fali ba banku.

Xefe Governu explika katak, hare ba situasaun ida ne’e mak oras ne’e dadaun banku fó funan bot, 12-14 %, entaun ho funan bot hanesan ne’e difisil atu halao negósiu ho dia.

Tuir PM, ita tenki muda ambiente negósiu, dalan ida mak fó garantia, banku dehan sei iha ema ruma fó garantia, tamba banku fo empresta osan mak ema ne la devolve fali entaun tenki iha ema seluk mak suporta, selae komplikadu.

“Iha debate Orsamentu Geral Estado hau informa katak governu kria ona programa ida Garantia ba Emprestimu Bankariu, signifika governu tau fundu ida atu fó garantia ba emprezas kiik sira neb’e husu kreditu iha banku bele hatun funan ituan, entaun makenismu ida ne’e bele kria ambiente negósiu ne’ebe diak no bele dudu desenvolvimentu ekonomia ba oin”, PM dehan tan.

“Fundu ida ne’e tau ona iha Orsamentu Geral Estado 2017, agora falta hamosu Dekretu-lei ida oinsa atu regula,” Xefe Governu hatutan.

Maibe tuir Primeiro-ministro, atu hetan asesu ba ida ne’e, kliente tenki hatudu nia kapasidade iha area negosiu, laos fali ba tiha foti osan husi banku tamba nia hatene katak estadu fó garantia, ne’e labele, neduni tenki iha kriteria ida neb’e klaru. (Jornalista: Julia Chatarina/Editor: Alberto Alves)

Foto: Primeiru-Ministru (PM), Rui Maria de Araújo no Sekretariadu Estadu Komunikasaun Sosial (SECOMS), Nelio Isaac Sarmento. Foto, ANTIL/ António Gonçalves, Tersa, 03/01/2017
PARTILHAR

Author: verified_user

Publicação luso-timorense sem fins lucrativos

0 comentários: