FILA MAI RAI MORIS FATIN, MARIA VITÓRIA SENTE ORGULLU

Maria Vitoria (MARVI), IV lugar iha kompetisaun Dangdut Akademia Asia 2 (DAA2) ne’e sente orgullu no antusiaismu ho povu Timor Leste (TL) ne’ebé simu nia iha Aeroportu Internasional Prezidenti Nicolau Lobato hodi hala’o karavana haleu sidade Díli, Kinta (5/1).

“Ida ne’e hanesan orgullu ida mai ha’u, ba oin ha’u bele hadia di’ak liu tan, la haluha agradese ba Primeiru Ministru (PM), Prezidenti da Republika (PR), Avo Xanana, membrus Governu hotu no Parlamentu, deskulpa ha’u labele temi ida-idak, tanba imi nia domin ne’ebé fó, ha’u sura labele, ba povu tomak maske loron manas maibé pasiensia hodi hein ha’u,” dehan MARVI ho matan-wen.

Iha oportunidade ne’e mós nia agradese ba Na’i Jesus ne’ebé haraik kbi’it no forsa hodi bele tuir kompetisaun Dangdut Akademia Asia 2 liu husi kanal Indonesia ne’ebé hala’o iha Indonesia husi inísiu to’o remata.

Nune’e mós reprezentante familia MARVI, Pe. Tiago Soares da Costa lori familia ninia naran iha parte ida orgullu, segundu sai mós hanesan todan ida. Ohin ema hotu basa liman maibé MARVI liafuan ne’ebé ema louva labele sama ba rai, kontinua nafatin, ohin kiak, la’os riku maibé naran ne’e importante.

Entretantu Sekretariu Estadu Juventudi no Desportu (SEJD), Leovigildo Hornay agradese ba povu tomak ne’ebé ho pasensia simu Maria Vitoria maske loron manas. Nune’e mós agradese ba Na’i Maromak ba buat kmanek ne’ebé iha.

“Lori Governu nia naran hamutuk ho Na’i Lulik, Inan Aman tomak, diretur eskola sira, ba Padre ne’ebé orienta MARVI rasik, komisaun organizadora no parseiru sira DJUKDIL, ETO +, Rede Feto ho Media sira ohin ita hahu simu ho honra, ho dignidade ba ita nia heroi foun naran Marvi,” dehan Leovigildo Hornay iha salaun konferensia imprensa Aeroportu Comoro.

Iha fatin hanesan prezidenti komisaun organizadora, Ezme Borges hatete, nia lori artista tomak no komisaun organizadora haksolok no simu alin MARVI ne’ebé sai nu’udar embaxiadora múzika ba Timoroan hotu.

Nune’e mós Vise Ministra Edukasaun, Dulce de Jesus Soares informa katak, tuir orientasaun ba Primeiru Ministru (PM) nian katak Governu disponivel fó apoiu ba MARVI bainhira MARVI hakarak kontinua nia edukasaun, tanba ne’e desizaun depende ba MARVI no familia.

Entretantu Sekretariu Estadu Mulher (SEM) Veneranda Lemos hatete katak Maria Vitoria sai ona heroi múzika Timor Leste, heroi foun ba juventudi Timor nian, lalaok ida ne’e maka presiza halo tuir.

“Hanesan Sekretariu Estadu ne’ebé haree asuntu feto nian ami orgullu tebes, hanesan VI Governu Konstitusional ami sei kontinua nafatin ho orientasaun Primeiru Ministru nian ne’ebé fó, agora depende ba Maria no familia sira hakarak atu Maria estuda iha ne’ebé,” dehan Veneranda.

Artista famozu Timor Leste (TL) Maria Vitoria (MARVI) ne’ebé durante fulan rua resin komunidade sira iha sidade Díli hein, konsege to’o duni iha nia rai moris fatin Díli Timor Leste (TL) horseik.

MARVI ne’ebé konsege sai IV lugar iha D’Acedemy Asia 2 (DAA2) ne’e, hetan surpreza boot ida husi ninia fans no komunidade sira iha sidade Díli ne’e, simu ho espesial tebes, wainhira tun husi aviaun Sriwijaya iha tuku 13:30 otl.

Wainhira sama ain fila fali iha Aeropotu Internasionál Prezidenti Nicolau Lobato Comoro Díli, Perola de Timor ne’e, hamonu nia matan wen, wainhira hateke areadores Aeroportu nian, tantu husi estrada tama to’o mai iha sala hein VIP nian ne’e, suli nakonu ho ema mesak oi-oin.

Mai husi nivel altu sira hanesan membrus Governu, jovens feto no mane, labarik ki’ik eh boot, ferik eh katuas ne’ebé hein MARVI desde dadersan to’o iha meiudia iha Aeroporto Comoro.

MARVI labarik ki’ik ida ho idade 15 ne’ebé solene i mínimu iha koñesementu liu-liu konaba múzika, i durante ne’e ema barak lahatene se maka Maria Vitoria, Maria mai husi familia ne’ebé simples, nia inan ho aman lor-loron tenki ba ku’u kanko mai kesi depois ba fa’an hodi sustenta sira nia uma laran, maske ho kondisaun hanesan ne’e maibe lahamate Maria Vitoria nia espiritu hodi kadi nafatin lian ne’ebé nia iha maske hamutuk deit ho labarik sira ne’ebé idade hanesan ho nia.

Nia rona tiha dehan katak husi Indosiar loke audisi ba Dangdut Academia Asia2 (DAA2) iha Timor Plaza no fo oportunidade ba ema hotu ne’ebé bele kanta ho genre ou aliran dangdut, ho ida ne’e Maria Vitoria ho aten brani akompaña husi nia mama hodi hakat ba tuir audisi ne’e maibe antes atu tuir nia papa tenki esforsu an ba ku’u kanko ba faan hodi bele sosa nia vistidu no sapatu hodi ba tuir audisi ne’e.

Iha audisi ne’e Maria Vitoria konsege hetan bileti ida hodi ba tuir kompetesisaun ne’e iha palku DAA2 Indosiar hamutuk ho nia kolega nain 5 ne’ebé mai ho background kantador hotu, maibe saida mak akontese la espera katak nia kolega nain 5 hetan eliminasaun no Maria maka sai hanesan 4 lugar iha DAA2 ne’e.

Ho esforsu ne’ebé Marvi hetan halo Timor oan hotu orgulho no hakarak Marvi tenki mai lalais, tanba ne’e iha dia 5/01/2017 liu husi servisu hamutuk entre SEJD, ETO + no artista senior sira, Marvi mai duni iha nia rai moris fatin.

Antes Maria to’o kuase komunidade sira antusiasmu hodi simu Marvi no wainhira nia to’o iha Aeroportu Internasional Nicolau Lobato ho aviaun Sriwijaya ho marka PK – CMI iha oras 01:35, komunidade sira ho kontente basa liman hodi hakilar viva Marvi.

Depois de ida ne’e Marvi ho ekipa kontinua kedas halo pawai ga konvoi, haleu Díli laran tuir rute ne’ebé fó sai tiha ona, no hetan seguransa másimu husi Polisia Nasionál Timor Leste (PNTL) husi unidade Taks Force no Tranzitu.

Tuir observasaun husi Jornalista Jornal Nacional Diário iha terrenu nota katak, kuaze tuir dalan komunidade sira simu Maria Vitoria ho antusiaismu, hahú husi labarik ki’ik, joven, katuas, ferik, antes kontinua nia konvoi ne’e Marvi sei vizita nia uma maske iha minutu balun, husi familia simu Maria ho tara tais no dansa kultura, depois ida ne’e nia kontinua konvoi tuir rute ne’ebé iha, maibé rute ne’ebé loloos fó sai katak sei liu husi Igreja Katedral nia oin la konsege liu. Tanba tuir ajenda MARVI tenki halo konsertu hodi anima ninia fans no komunidade sira iha Díli iha Centro Convenções de Díli (CCD), iha tuku 19:00 Otl.

Akontese asidenti tráfiku

Díli iha loron ida ne’e, (Kinta feira, 5/1), ne’e la hanesan ho loron bai-leet, ne’ebé movimentu la’o normal, laiha engarafamentu iha fat-fatin. Maibé loron ida ne’e obrigadu tenki akontese engarafamentu iha fat-fatin no akontese mós asidente tráfiku ne’ebé rezulta transportes roda rua ho roda hat no nen sira konsege kose malu.

Iha asidenti ne’e rezulta, motorizada ida ho xapa mátrikula polisia C 0468 soke malu ho kareta ho xapa matríkula 27. 692.

“Motorizada ne’e halai tesik mai maka’as tebes no hakarak atu halai lalais tanba atu ba haree movimentu Marvi nian. Maibé nia la haree katak kareta ida mós sai husi dalan kampung merdeka nian ho nune’e motor ne’e halai ba soke deit kareta ne’e ho velosidade ne’ebe makas ho nune’e ema ida lori motor ne’e ain tohar kedas iha fatin no tula fali ho taxi ba Klínika Kampung baru nian,” haktuir sasin Domingas da Costa, ba JN-Diário iha fatin akontesimentu Comoro-Kampung Baru-Díli, Kinta (05/01/2017).

Tuir observasaun jornalista katak, husi asidenti ne’e rasik kondutor ne’ebe lori kareta la kanek, maibe odamatan oin kareta nian mak rahun, no husi akontesimentu ne’e seidauk rezolve, tanba sei atende ema ne’ebe tohar no laiha prezensa polisia iha fatin akontesimentu.nes/ita

Jornal Nacional – foto barak iha JN