PR TAUR: ELEISAUN 2017 SEI LA’O HO DAME

Prezidenti Repúblika (PR), Taur Matan Ruak optimista katak, eleisaun Prezidensiál no eleisaun jeral iha 2017 ne’e sei la’o ho dame.

“Prezidenti Repúblika mós optimista katak, iha 2017 Estadu ou nasaun sei liu husi prosesu eleisaun ho hakmatek no dame,” informa Primeiru Ministru (PM) Rui Maria de Araújo ba jornalista sira, hafoin hasoru malu ho Xefi Estadu Taur Matan Ruak, iha Palácio Prezidensiál Nicolau Lobato Aitarak Laran Díli, Kinta (05/01).

Iha sorumutu regular, Xefi Governu ho Xefi Estadu ne’e, alénde ko’alia konaba eleisaun jeral no prezidensiál ne’ebé sei hala’o iha fulan hirak tuir mai, no koalia mós konaba asuntus nasionál balun ne’ebé kontinua sai asuntu prinsipál Governu no Estadu nian ba tinan 2017 ne’e nia laran.

“Aproveita hato’o mós informasaun ba Prezidenti Repúblika, konaba planu Governu nian, liu-liu konaba oin sa liñas jerais atuasaun Governu nian iha ne’ebé de’it. Ami hato’o ba Prezidenti Repúblika katak, iha 2017 ne’e, Governu sei kontinua konsentra ba iha prestasaun servisu hot-hotu ne’ebé Governu iha responsabilidade atu fó ba ita nia populasaun,” katak PM Rui.

Nune’e mós PM Rui Araújo dehan, enkontru ne’e mós, bele reforsa di’ak liu tan relasaun instituisaun entre Governu ho Prezidensia Repúblika.

“Tanba, tinan ida ne’e, ita tama ona ba tinan eleisoens ninian, povu tomak sei hetan oportunidade atu hili fila fali sira nia lideres, ne’ebé sei lidera órgaun soberania importante tolu iha ita nia nasaun hanesan, Parlamentu Nasionál, Prezidenti Repúblika no Governu,” dehan PM Rui.

Eis Ministru Saude iha Primeiru Governu konstitusionál ne’e afirma katak, ema sira ne’ebé atu mai kaer ukun ne’e, sei hala’o sira nia kna’ar husi 2017-2022, hodi nune’e síklu dezenvolvimentu ne’e bele la’o nafatin ba oin.

Eis Asesor Ministériu Finansas iha IV Governu konstitusionál ne’e fundamenta katak, Governu sei jere nafatin investimentu ne’ebé mak halo iha infraestrutura, kapital humanu, atuasaun Governu ba oinsa kria kondisoens téknikas para órgaun eleitoral sira hanesan STAE no CNE bele hala’o sira nian servisu, organiza eleisaun Prezidensiál no Parlamentar iha tinan ida ne’e ho susesu.

Kontinua avansa ho kazu FM

Alénde kestaun sira seluk ne’ebé mensiona ona iha leten, Primeiru Ministru (PM), mós dehan, tinan 2017 ne’e, Governu kontinua avansa ho kazu delimitasaun Fronteira Marítima ho Australia. Tanba asuntu ne’e mós sai hanesan liña atuasaun importante Governu nian ba 2017.

“Kontinua ho prosesu delimitasaun fronteira marítima ne’ebé ita halo ho ita nia viziñu sira, inklui Australia ne’ebé liu husi prosesu konsiliasaun obrigatóriu,” Rui Araújo fundamenta.

Rui Araújo esplika katak, iha 2017 nia laran, sei iha reuniaun lubuk ida mak sei hala’o, tanba ne’e, Xefi Estadu ne’e hato’o briefing ba PR Taur Matan Ruak konaba lala’ok prosesu ne’e. “Hanesan ita bo’ot (jornalista) sira hatene, konteudu husi konsiliasaun obrigatóriu ne’e konfidensial, ne’ebé ha’u labele ko’alia ba média konaba saida de’it mak atu halo,” katak Rui Araújo.

Xefi Governu ne’e mós afirma katak, aproveita sorumutu ne’e, lori Governu nia naran komprimenta PR hanesan aman ba nasaun ida ne’e.

“Ohin ha’u mai ho Ministrus Estadu Prezidensia Konsellu Ministrus, Agio Pereira, ho Ministru Koordenador Asuntu Administrasaun Estadu no Justisa, Dionisio Babo lori Governu nia naran hato’o boas entradas ba Prezidenti Repúblika,”Xefi Governu ne’e.cos

Jornal Nacional