quinta-feira, 5 de janeiro de 2017

PM: Prosesu Konstrusaun Estado Presiza Timor Oan Barak

PARTILHAR
DILI (ANTIL) - Primeiru-Ministru (PM), Rui Maria de Araújo iha Matadouru, Kuarta (04/01/2017) hateten timoroan uitoan tebetebes mak halao knar boot iha prosesu konstrusaun Estadu.

“Ita uitoan, la sufisiente tanba ne’e dala ruma ita sei presiza kontratu asesór, lori ema mai husi liur para halo servisu, tanba ita uitoan”, PM hato’o ida ne’e wainhira partisipa iha serimória auto entrega Inspesaun Alimentár Ekonómiku ba Autoridade Inspesaun no Fiskalizasaun ba Atividade Ekonómika, Sanitária no Alimentár I.P (AIFAESA).

PM subliña ho ema uitoan ne’e maibé, dala barak konta ho forsa hotu-hotu haree husi aspetu pozitivu no negativu ita mak buka fahe malu fali.

“Diskusaun ida ké ikus mosu maka’as ne’e mak dupla nasionalidade, hatete dehan ema ne’ebé dupla nasionalidade labele ezerse kargu iha Estadu, ha’u-nia hanoin sala. Ita Timór ne’e uitoan demais, sé ita haree di’ak país sira ne’ebé avansa maka’as iha mundu ne’e, Kabu Verde, Israel, país ki’ikoan sira ne’e, sira-nia komunidade iha diáspora nia kontribuisaun ba dezenvolvimentu nasionál ne’e boot tebetebes”, PM dehan.

PM hatutan, klaru katak Timor-Leste foin mak tinan 14 no iha preokupasaun hotu maibe hau hatete katak tanba dupla nasionalidade labele ezerse kargu ka serbisu iha Timór ne’e pensamentu ida ne’ebé sala.

“Loos duni katak ema balun dupla nasionalidade hamosu problema maibé ne’e la’ós tanba dupla nasionalidade, tanba ema ne’e mak hamosu problema, ne’ebé ita labele fó sala fali dupla nasionalidade ne’e”, PM katak.

“Ha’u apela, hanesan timoroan, hanesan servidór Estadu, loos duni de vez enkuandu ita sente hanesan liuhusi prosesu ne’e ita la konsidera malu, la hasee malu, importante mak objetivu prinsipál ne’e saida, ita tenki halo ba Estadu no Nasaun atu avansa ba oin”. (Jornalista : Maria Auxiliadora/Editor : Alberto Alves)

Foto: Primeiru-Ministru, Rui Maria de Araújo. Foto Espesiál.
PARTILHAR

Author: verified_user

Publicação luso-timorense sem fins lucrativos

0 comentários: