sexta-feira, 6 de janeiro de 2017

LA FASIL HALO AKORDU EXTRADISAUN

PARTILHAR
Ministru Koordenador Estado Asuntu Administasaun no Justisa, Ministru Administrasaun Estatal, Dionisio Babo Soares, hateten katak, halo akordu extradisaun la’os fasil, presiza vontade husi nasaun rua.

“Tuir lei internasional katak, primeiru tenke iha espresaun politika, vontade politika husi nasaun ne’ebe mak iha intensaun atu halo akordu extradisaun, hanesan ema husi nasaun ida halo krime halai ba subar iha nasaun seluk, maibe extadisaun iha lei internasional nia okos aplika deit ba iha prizioneiros de konsiensia katak ema ne’ebe mak Estado halo perseguisaun tanba deit sira nia politika lahanesan,” esplika  Dionisio Babo hodi responde jornalista sira iha nia servisu fatin, Kuarta (4/1/2017).

Nia hatutan, Ministeriu estranjeiro husi nasaun rua mak bele halo akordu extradisaun, kuandu akontese prizioneiru husi nasaun ida ba fali nasaun seluk.

“Ministeriu Negosio Estranjeiro husi nasaun rua ne’e maka koalia ba malu, depois koalia ho Governu katak hakarak atu halo akordu, entaun Governu halo analiza, kaundu bele, ministeriu negosio estranjeiro serbisu hamutuk ho ministeriu justisa draf akordu, akordu ne’e iha area oi-oin,” Dionisio hateten.

Kuandu elabora hotu hodi ba konselho Ministru, depois hodi ba Parlamentu Nasional (PN) hodi ratifika, atu nune’e akordu vale. “Atu halo akordu extradisaun la’os kazu ida deit, tenke kazu barak, la’os tanba deit ema ida tenke halo akordu extradisaun, ita labele halimar ho nasaun nia prestiju, agora akontese ba ema ida, aban bainrua akontese fali ba ema seluk karik, ne’ebe ita tenke kuidadu, opiniaun publiku halai tuir sira nia kabun la’os halai tuir rasio,” Dionisio esplika.

Bainhira husu kona ba kazu Emilia, Ministru Dionisio lakohi fo komentariu. “Hau lakohi fo komentariu ba kazu ida ne’ebe mak ninia prosesu sei iha tribunal, imi (red-jornalista) husu pergunta los ona, maibe ninia konsekuensia ne’e ba ami,” hateten  Dionisio Babo.mia

Jornal Nacional
PARTILHAR

Author: verified_user

Publicação luso-timorense sem fins lucrativos

0 comentários: