Povu Mak Sei Fihir Kandidatura PR 2017-2022

DILI – Iha Janeiru tinan 2017 nia laran hahu husi 1 too 31, Timor oan nain 7 mak deklara-an ona ba publiku hodi kandidata-an ba Prezidente Republika (PR) periode 2017 too 2022 mak hanesan, Amorim Vierra, Antonio Fatuk Mutin, Jose Luis Guterres Lugu, Francisco Guterres Lu-olo, Angela Freitas no Antonio da Conceição.

Ho kandidatura nain 7 nee nain 2 mak ofisialmente rejista ona iha supremiu Tribunal Justisa (STJ) mak konsidera legal hanesan Amorim Vieira no mos Jose Neves alias Samalarua.

Tuir Observador Politika-UNTL, Victor Soares hatete, prespektiva akademika nia haree ba kandidatura nain 7 hodi hadau kadeira 1 iha palasiu prezidente iha Aitarak laran povu mak deside.

Kandidatura Prezidente Republika (PR) tinan 2017 too 2022 nee nain 7, nain 7 se mak hili sai Prezidente Timor Leste nee povu mak deside,” dehan Observador Politika-UNTL, Victor Soares ba STL iha nia knar fatin FONGTIL, Caicoli-Dili, Kuarta (01/02/2017).

Observador Politika realsa, konaba kandidatura PR aprezenta koalia programa iha kampania, tuir lolos Governu mak bele koalia tanba PR so garante deit estabilidade.

Iha sorin seluk, Diretor Ezekutivu FONGTIL, Arsenio Pereirra esplika, haree ba kandidatura ba PR komesa halo ona deklarasaun oin-oin, balun mai ho independente no mos balun husi partidu. Nia afirma, ba nia laiha prediksaun ba A ka B, maibe depende ba kampania no rezultadu eleisaun nee mak determinante, ita labele dehan jerasaun tuan ka jerasaun foun mak ba ona, depende eleitores sira mak fihir. Raimundo S. Fraga

Suara Timor Lorosae