JSMP KONSIDERA KARTA ABERTA XANANA, HANESAN AMEASA BA INDENPENDENSIA JUDISIÁRIU

Judicial System Monotoring Programme (JSMP), konsidera karta aberta ne’ebé mak Ministru Planeamentu no Investimentu Estratejiku, Kay Rala Xanana Gusmão, halo ba kondenada eis Ministra Finansas,  Emilia Pires hanesan aktu ne’ebé mak sai ameasa ba indenpendensia judisiáriu.

“JSMP kondena maka’as tebes tentativa politiku sira ne’ebé kontinua interfere iha sistema judisiariu. Pratika hanesan ne’e ameasa seriu ba indepedensia judisiariu no viola prinsipiu separasaun poder ne’ebé preve ona iha konstituisaun RDTL,”dehan Diretor Ezekutivu Luis Oliveira Sampaio liu husi konferensia imprensa iha edifisiu JSMP, Colmera, Kinta (2/01).

JSMP mos konsidera interferensia hirak ne’e prejudika tebes servisu setor judisiariu no hafraku instituisaun publiku ida ne’ebé Estadu rasik mak hari’i no investe, durante tinan barak nia laran. Ida ne’e mos prejudika konfiansa publika kona ba funsionamentu lolos no kredibilidade instituisaun judisiariu sira no violasaun ba prinsipiu igualidade no universalidade iha lei nia oin, tamba tau atensaun espesial ba kazu Emilia Pires hodi dezakredita no minimiza autoridade judisiariu ne’ebé tinan barak ona estabelese sistema judisiariu iha nasaun ne’e.

“Ami apresia katak, Ministru Xanana Gusmão demonstra nia dever sidadania atu kolabora iha prosesu ne’e no sai sasin ba kazu ne’e, pratika ne’ebé dala barak ita la hare husi lideraansa sira iha nasaun post konflitu sira seluk, maibe ami prekupa tebes tanba ho karta ne’e sai tiha kontra produtivu ho vontade inisiu ne’ebé ministru Xanana hatudu ona iha kazu ne’e”, esklarese Luis.

Arguida Emilia pires ka sidadaun se deit mak afetadu husi desizaun tribunal, bele uza ninia direitu legal sira hodi halo rekursu ba tribunal ne’ebé mak as liu, nia mak bele avalia desizaun primeiru instansia husi tribunal ne’e justu ona ba arguida Emilia ka lae.

Tanba ne’e JSMP mos enkoraza tribunal sira tenki respeita no tane as direitu sidadaun sira hotu atu hetan julgamentu ida ne’ebé justu no asegura katak desizaun judisial hotu hotu kredivel no bazeia deit ba faktus sira ne’ebé produs durante iha julgamentu.

Diretur ne’e afirma katak, hare ba situasaun kazu Emilia Pires nian ne’e mak liu husi oportunidade ne’e JSMP hakarak rekomenda ba sidadaun hotu hotu, lider politiku no figura importante sira ka fundador sira Estadu nasaun nian bele kontribui hodi hadia no haforsa sistema justisa formal ne’ebé sei frazil.

‘’Membru orgaun sira atu bele respeita prinsipiu separasaun poder ne’ebé preve iha artigu 69 konstituisaun RDTL iha halao sira nia knar nune’e bele respeita independensia orgaun judisiario nian iha administra justisa Estadu nasaun nian no ita mos husu ba lider politika sira husi orgaun soberanu sira atu tau interese nasional as liu husi interese individu ka grupu ida hodi labele sobu rahun fali sistema justisa Estadu nasaun nian ne’ebé hari ho tempu naruk esforsu no investimentu bo’ot,’’koalia Luis.

Tuir Diretor Ezekutivu Luta Hamutuk Mericio Akara katak, se iha intervesaun husi ida ba ida seluk, entaun Timor oan rasik mak ladun kumpri estadu de direitu demokratiku.

Presaun bele halo husi se deit, maibe Luta Hamutuk fiar, tribunal mantein nafatin sira nia independensia pozisaun no prosesu legal ne’ebé mak iha.

“Lalika preokupa demais presaun, basa instituisaun ida lao ladepende ba presaun maibe depende ba sistema no regra demokratiku no konstituisaun mak determina buat hotu,” dehan Mericio.

Antes ne’e, iha loron  25 fulan  Janeiru 2017, atual Ministru Planeamentu no Investimentu Estratejiku, Xanana Gusmao halo asaun solidaria ba kondenada Emilia Pires. Asaun solidaria ne’e manifesta liu husi karta ho pajina hamutuk sira ne’ebé entrega diretamente ba ajensia Lusa.

Karta ne’e halo depois de Eis-Ministra Finansa, Emilia Pires haruka karta aberta ba Prezidente Republika Taur Matan Ruak hodi konstesta prosedimentu no desizaun Tribunal Distrital Dili ne’ebé julga no deside kazu ne’e iha 20 de Dezembru 2016 liu ba. Karta ne’e mos husu ba Prezidente da Republika atu kria komisaun internasional espesialista eminente iha hodi ezamina laos deit ba nia kazu maibe sistema justisa formal iha jeral.

Luis mos esplika katak, iha karta solidariedade ne’e, Ministru Xanana Gusmao konsidera Eis Minstra Finansa, Emilia Pires no eis Vise-Ministra Saude , Madalena Hanjam nudar vitima ba injustisa husi justisa ne’ebé lao iha TL. Alem de ne’e halo kritika makaas ba autor judisiariu sira, hodi tau mos iha kestaun koñesimentu lian Portugues autor judisial sira katak, sira la hatene Portugues, maibe julga kazu ho lei sira ne’ebé hakerek ho Portugues no asina akordaun ne’ebé sira rasik la hatene. Nia

Jornal Nacional Diário