sexta-feira, 24 de fevereiro de 2017

Primeiru-Ministru timoroan halo vizita ofisial ba Nova Zelándia

PARTILHAR
Primeiru-Ministru timoroan, Rui Maria de Araújo, sei hahú, iha loron 25 Fevereiru, vizita ofisial ida ba Nova Zelándia.

Primeiru-Ministru timoroan sei halo reuniaun bilateral sira ho nia homólogu neozelandés, Bill English. Iha vizita ne'e sei akompaña hosi Ministru Negósiu Estranjeiru no Koperasaun, Hernâni Coelho, Ministru Interior, Longuinhos Monteiro no hosi Komandante-Jeral daruak hosi Polísia Nasional Timor-Leste nian, Faustino da Costa.

Primeiru-ministru timoroan sei vizita sidade sira Auckland, Wellington ho Dunedin. Iha programa hosi atividade sira sei inklui jantar ida negósiu nian iha Auckland hodi fó koñese ba partisipante sira kona-ba dezenvolvimentu hosi teritóriu timoroan nian no insentiva empreza sira hosi Nova Zelándia hodi halo investimentu iha Timor-Leste.

Delegasaun timoroan sei halo diálogu ho instituisaun sira ne'ebé iha experiénsia maka'as hanesan ezemplu Shaw Dairy Farm (indústria latisíniu sira), situa iha Auckland, no Royal Albatross Centre, iha península Otago (Dunedin), modelu ida ho susesu iha área ekoturizmu nian. Fahe experiénsia ne'e hakarak ajuda Timor-Leste hodi muda ba ekonomia ida ne'ebé diversifikadu liu.

Universidade Teknolojia hosi Auckland no Universidade Otago, iha Dunedin, sei simu mós delegasaun timoroan nian, iha oportunidade hodi hasoru malu ho estudante timoroan sira.
Nova Zelándia kontribui maka'as iha área defeza no seguransa durante restaurasaun independénsia, ne'ebé justifika vizita ida ba Akademia Polísia nian iha Wellington. Evolusaun hosi relasaun entre nasaun rua ne'e orienta hela ba dezenvolvimentu ekonómiku, liuliu iha área privadu, edukasaun no formasaun, seguransa ho justisa.

Ministru Negósiu Estranjeiru hosi Nova Zelándia, Murray McCully MP, halo ona vizita ba Timor-Leste iha tinan 2012 no 2014 no Embaixada Timor-Leste nian iha Nova Zelándia inaugura ona iha tinan 2014 iha sidade Wellington.

Porta-vós governu timoroan nian, Ministru Estadu Agio Pereira, hatete ona katak "Timor-Leste felisita oportunidade hodi insentiva parseria komersial ho reuniaun sira ho espesialista sira hosi Nova Zelándia iha área sira ho importánsia maka'as ba nia diversifikasaun ekonómiku. Primeiru-Ministru nia viajen sei hametin relasaun di'ak sira ne'ebé ezisti ona entre nasaun rua ne'e, ne'ebé halo ho amizade no koperasaun".

Fonte: Portal do Governo de Timor-Leste, em SAPO TL
PARTILHAR

Author: verified_user

Publicação luso-timorense sem fins lucrativos

0 comentários: