Titulár Kargu Polítiku iha Dever Espésial

DILI (ANTIL) – Juíza Tribunál Rekursu, Maria Natércia Gusmão dehan, titulár sira ne’ebé ka’er kargu polítiku, sira iha dever espesiál ida atu defende valór ne’ebé pertense ba Estadu, karik mosu violasaun ruma hosi dever ne’e bele implika ba responsabilidade kriminál.

Jurista Timoroan ne’e, hato’o iha Konferensia Internasionál Kompromissu Parlamentu no Kombate korupsaun ho tema Definisaun Responsabilidade Penál Titulares Kargus Polítiku no Kostituisaun Repúblika Demokrátika Timor-Leste (RDTL), loron daruak nian iha salaun nobre Ministériu Negosiu Estranjeiru no Koperasaun (MNEK), Sesta (3/2).

Nia hatutan, lei espésial ba responbilidade la-eziste iha nasaun ne’e. Tanba ne’e, lei krime nia responsabilidade mosu ba titulár kargu polítiku sira. “Hanesan ne’e respobilidade kriminál abrajen mós krime ida ne’ebé previstu iha direitu penál jerál, relasionadu ho papel no kna’ar funsaun polítika”, katak tan.

Titulár sira sei hatan polítika sívil no kriminalmente ba asaun ruma bainhira ezerse funsaun polítika. “Titulár ba kargu polítika hanesan Prezidente Repúblika (PR), Parlamentu Nasionál (PN), Governu no Tribunál, ezeptu juiz sira ezerse sira nia funsaun juridisionál no sira labele ezerse funsaun polítika”, afirma.

Nune’e nia konsidera, pratika hosi titulár kargu polítiku nian bainhira ezerse funsaun, hahalok ka krime ne’ebé previstu iha lei penál jerál, fó ona interesse, espressa ba funsaun sira ne’ebé sira ezerse. Atu dehan, hahalok ne’e hatudu pratika abuzu iha sira nia funsaun ou halo violasaun grave ba sira nia dever funsionál.

Kodiku penál Timor Leste, krime ne’ebé bele prátika bainhira bele ezerse funsaun públika mak hanesan krime ne’ebé ho asaun forma desviu poder, halo hosi ema sira ne’ebé hetan fasilidade hosi nia funsaun. (jornalista: Julia Chatarina; editora: Rita Almeida)