sábado, 4 de fevereiro de 2017

Lú-Olo Aprezenta Ona Lista Kandidatura Ba Tribunál Rekursu

PARTILHAR
DILI, (ANTIL) – Kandidatu Prezidenti Repúblika periodu 2017 to’o 2022, Francisco Guterres Lú-Olo aprezenta ona ninia lista apoiante kandidatura ba Tribunál Rekursu, Sesta ne’e, tuku 15:00. Lista ne’e, apoiante hamutuk ema na’in 13,130 maka apoia eis Prezidenti Parlamentu Nasionál nia kandidatura. 

Iha nia entrevista ba jornalista sira, Lú-Olo garante sei manán iha eleisaun. “Ha´u kandidata-án atu manán. La manán karik tanbasá ha’u tenki kandiidata ha’u nia án”, nia hateten iha edifísiu Tribunál Rekursu, Kaikoli.

Nia husu ba Tribunál Rekursu serbisu hamutuk ho Sekretariadu Tékniku Administrasaun Eleitorál (STAE) atu verifika lista kandidatu sira ho justu. Maske nune’e, nia fiar katak sira sei halo serbisu di’ak hodi fó satisfasaun ba timoroan tomak.

Iha fatin hanesan, juiza Tribunál Rekursu, Maria Natércia Gusmão reprezenta Prezidenti Tribunál Rekursu, Guilhermino da Silva hatete, kandidatu balun maka tribunál intrega hikas sira nia dokumentu tanba la priénse kritériu ne’ebé lei hateten katak reprezentante kandidatu hosi kada munisípiu mínimu ema na’in 100. Realidade, nia haktuir, kandidatu sira ne’e balun hetan de’it apoiante 36 mai kraik iha kada munisípiu.

“Sira iha duni kandidatu sira ne’e maibé duplikadu tiha ona. Pur-zemplu, sira apoiu tiha ona kandidatu A, maibé apoia tan kandidatu B ne’ebé detekta hosi sistema STAE. Ida ne’e lei bandu,” nia dehan.

Juiza ne’e lakohi temi kandidatu balun ne’ebé halo duplikasaun ba lista, tanba segredu. Natércia promete, sei dezempeña funsaun ne’ebé iha atu halo serbisu ho imparsiál.

Kandidatu Lú-Olo marka prezensa iha Tribunál Rekursu akompañadu hosi Sekretáriu Jerál Partidu FRETILIN, Marí Alkatiri, deputadu balun hosi bankada FRETILIN iha Parlamentu Nasionál, membru Komité Sentrál FRETILIN no militante FRETILIN. (jornalista: Xisto Freitas; editora: Rita Almeida)

Foto: Kandidatu Prezidenti Repúblika, Dr. Francisco Guterres Lú-Olo hasai foto hamutuk ho ninia susesór sira iha Tribunál Rekursu, Caicoli, Dili, molok aprezenta lista apoiante kandidatura ba Tribunál Rekursu. Foto ANTIL/Xisto Freitas
PARTILHAR

Author: verified_user

Publicação luso-timorense sem fins lucrativos

0 comentários: