sábado, 27 de maio de 2017

ONU fó sai perseguisaun, detensaun no tratamentu aat ba homoseksual sira iha Indonézia

Iha loron-sesta ne'e, ONU konsidera ona hanesan preokupante kazu barak ba perseguisaun, detensaun ne'ebé halo arbiru no tratamentu aat hasoru mane sira ne'ebé konsidera hanesan homoseksual sira iha Indonézia no husu ona ba autoridade sira hodi proteje sira nia direitu, hanesan sidadaun sira seluk.

Tuir Komisariadu Aas ONU nian ba Direitu Ema nian, iha fulan rua ikus ne'e kaer ona mane hamutuk na'in 150 resin iha Aceh (teritóriu hosi norte illa Sumatra nian), nune'e mós iha Jakarta, kapital nasaun nian, no iha Surabaya, sidade daruak ho populasaun barak, tanba iha relasaun seksual konsensual sira ho mane sira seluk.

Sira ne'ebé kaer barak hetan libertasaun iha prazu ne'ebé badak tebes, maibé balun hetan akuzasaun iha kuadru hosi lei hasoru pornografia.

"Mane sira ne'ebé hetan kaer hanesan vítima sira hosi humillasaun públiku no estigmatizadu sira. Iha kazu balun sira nia naran, foto sira ho vídeo sira entrega ona ba meiu komunikasaun sira", lamenta hosi porta-vós hosi komisariadu nian, Rupert Colville.

Iha kazu balun, obriga ema sira ne'e halo teste SIDA no mane na'in rua ne'ebé kaer iha Aceh hetan baku iha públiku ho ai hafoin hetan julgamentu hosi tribunal sira ne'ebé aplika lei islámiku (‘sharia’).

ONU refere katak insidente sira rejista iha kontestu ida hosi atake violentu sira hasoru ema lésbika, ema biseksual sira, ka transjéneru sira iha Indonézia, ne'ebé iha mós "diskursu sira ódiu nian" hosi parte grupu relijiozu balun no liuhosi imprensa.

"Hahalok sira relasionadu ho ema lésbika sira, ema homoseksual sira, ema biseksual sira no ema transjéneru sira bele la hanesan hosi nasaun ida ba nasaun seluk, maibé padraun direitu ema nian hanesan. Direitu internasional hanesan klaru: ema tomak, lahó esepsaun, iha direitu ba protesaun hosi sira nia direitu", deklara hosi Colville.

Nia hatete katak detensaun ba ema sira tanba nia orientasaun seksual ka identidade jéneru nian hanesan "tuir definisaun arbitráriu" no husu ona ba autoridade indonéziu sira atu hasai ema sira ne'ebé kaer tanba motivu ne'e.

SAPO TL ho Lusa | Foto@ Luong Thai Linh /EPA

Sem comentários: