Atividade Ekleziastíka Governu Apoia Osan Millaun 15.7

DILI (TATOLI) - Primeiru Ministru Rui Maria de Araújo fo sai katak, Governu Timor-Leste Preve finansiamentu ba igreja katólika ho valór kuaze dolár millaun 15.7 nu’udar kontribuisaun estadu ba Conferência Episcopal Timorense (CET).

“Preve pelumenus pursentu 75 kontribuisaun estadu liuhusi konferénsia episkopál hodi kanaliza ba atividade sira hanesan luta kontra hamlaha, área intervensaun xave ba dezenvolvimentu no ba hamenus dezigualidade no ekskluzaun sosiál,” Primeiru-Ministru Rui haktuir hafoin asina ofisialmente akordu kuadru no akordu anuál subvensaun ho Conferência Episcopal Timorense (CET), ohin iha salaun Ministériu Negósiu Estranjeiru no Kooperasaun (MNEK), Praia dos Coqueiros, Díli hodi hala´o atividade ekleziastíka hodi serve komunidade no sarani iha Timor-Leste.

Primeiru-ministru Rui Maria de Araújo iha nia intervensaun informa katak, iha akordu ne´e Pursentu 50 ba atividade área edukativa nian, pursentu 25 ba iha área sosiál no restu pursentu 25 ba atividade governu eklesiál no jestaun.

Akordu ne´e nu´udar pasu fundamentál ida ba konsolidasaun relasaun entre estadu Timor-Leste no Santa Sé no sei servi ho baze, tuir mai akordu subvensaun ne´ebé governu Timor-Leste tinan-tinan sei firma ho Conferência Episcopal Timorense.

Iha 2017 ne´e, governu liuhusi Orsamentu Jerál Estadu (OJE) asina mós akordu subvensaun anuál ba igreja katólika ne´ebé hamahan aan iha Dioseze Baucau, Díli no Maliana. Preve finansiamentu ba igreja katólika ho valór kuaze dolár millaun 15.7.

Prezidente Conferência Episcopal Timorense, Don Basílio do Nascimento hateten, bainhira apoiu ne´e iha CET, tékniku sira mak sei jere, sei aplika ba prioridade ne´ebé mak iha.

“Buat hotu prioridadade maibé iha momentu ne´e Igreja tenta sai komplementu ida ba governu hanesan edukasaun no asisténsia sosiál. Importante tebes mak edukasaun,” informa Bispu Dioseze Baucau ne´e.

Autoridade másima Conferência Episcopal ne´e mós informa katak ideia atu halo subvensaun ba CET ne´e mai husi eis-primeiru-ministru primeiru konstitusionál, Mari Alkatiri depois governu sira tuir mai kaer nafatin.

“Primeiru-Ministru Rui Maria de Araújo mak hetan tempu, hetan fatin, iha biban hodi empeña nia aan halo akordu,” nia haktuir.

Entretantu konkordata, Timor-Leste ho Vatikanu asina ona iha Timor-Leste iha 2015 ho reprezentasaun espesiál vatikanu eminente Pieter Parolin.

Jornalista: Rafy Belo | Editor: Manuel Pinto

Foto: Kaer liman hafoin asina akordu anuál subvensaun husi Primeiru-Ministru, Rui Maria de Araújo ho Prezidente Conferência Episcopal Timorense, Dom. Basílio do Nascimento.