sábado, 17 de junho de 2017

PARPOL Asina Paktu Unidade Hodi Hametin Páz iha Kampaña Elpar

DILI (TATOLI) - Partidu polítiku (PARPOL) sira asina paktu unidade hodi evita violénsia iha kampaña eleisaun parlamentár (Elpar) ne´ebé sei hahú iha 20 Juñu 2017 no eleisaun parlamentár iha 22 Jullu.

Paktu unidade ne´ebé hala´o iha Palásiu Prezidénsia Repúblika, Bairu-Pité, Dili, kinta horsehik ne´e nu´udar inisiativu hosi Prezidenti Repúblika, Dr. Francisco Guterres Lú-Olo.

Partidu polítiku hanesan instrumentu ba demokrasia, tanba ne’e presiza kria kondisaun hodi hametin páz no estabilidade durante kampaña to’o tempu votasaun. Páz no estabilidade nu’udar pre-kondisaun atu haburas no hametin demokrasia.

Partidu polítiku sira hotu komprometidu no promete ba Prezidenti Repúblika atu halo buat hotu ne’ebé bele garante kampaña eleisaun parlamentár no eleisaun parlamentár sei la’o ho di’ak; livre, transparente, justu, kredível, laiha violénsia no mós hakmatek. Kontiudu hosi paktu unidade ne´e maka hanesan tuir mai ne´e.

Partidu polítiku sira hotu sei halo buat hotu atu hametin páz no estábilidade iha tempu kampaña, loron eleisaun, tempu kontajen no mós tempu publikasaun rezultadu tanba páz no estabilidade importante ba haburas no hametin demokrasia.


Partidu polítiku sira sei halo buat hotu atu respeita malu no la soran militante, simpatizante no apoiante sira hodi hadook an husi violénsia.

Partidu polítiku ho sira-nia militante, simpatizante no apoiante sira sei hakribi violénsia.

Partidu polítiku sira kompromete atu la uza osan ka hala’o prátika money politics, kampaña foer no uza meius Estadu nian ba benefisiu partidária.

Partidu polítiku sira mós hakribi no la tolera rejionalizmu, ataka pesoal hasoru ema nia orijin, rasa no relijiaun iha tempu kampaña eleitora.

Partidu polítiku sira sei hakruk ba desizaun sidadaun sira nian ne’ebé  hatún liuhusi sira-nia votus iha eleisaun ida ne’ebé livre no demokrátiku.

Partidu polítiku sira apresia no loúva inisiativa Prezidenti Repúblika nian hodi halibur partidu polítiku sira ne’ebé tuir eleisaun parlamentar atu deklara ami-nia kompromisu ba páz no estabilidade nasionál no husu ba Prezidenti Repúblika atu serbisu hamutuk ho Órgaun Soberania Estadu sira seluk atu garante eleisaun parlamentar tinan-2017 sei la’o iha páz, estabilidade no unidade.

Partidu polítiku sira husu ba Instituisaun sira iha Estadu ne’ebé responsabiliza eleisaun atu garante transparensia no imparsialidade iha eleisaun parlamentar tinan ida ne’e.

Partidu polítiku sira sei hala’o buat hotu atu garante no hametin liu tan unidade nasionál no sei tane ás Paktu Unidade Nasionál ne’ebé partidu sira hotu asina tiha ona.

Partidu sira ne´ebé asina paktu unidade maka hanesan Bloku Unidade Popular (BUP), Assoçiacão Popular Monarquia Timorense (APMT), Partidu Kmanek Haburas Unidade Nasional Timor Oan  (P.KHUNTO), Partido Esperança da Pátria (PEP), Partido Socialista de Timor  (PST), Partidu Dezenvolvementu Popular (PDP), Congresso Nacional de Reconstrução de Timor-Leste (CNRT), Partidu Republikanu  (PR), União Democrática Timorense (UDT), Partido Democracia Cristã  (PDC), Movimento da Libertacão do Povo Mau Bere (MLPM), Partido da Libertação Popular (PLP), Partido Democrático (PD), Unidade Nacional Democrática da Resistência Timorense (UNDERTIM), Partidu Unidade Dezenvolvementu Demokratiku (PUDD), Partido Timorense Democrático (PTD), Partido Frenti Mudança (PFM), Partido Social Democrata (PSD), Partido Centro Ação Social Democrata Timorense (CASDT), Partido Desenvolvimento Nacional (PDN) no Frente Revolucionária do Timor-Leste Independente (FRETILIN).

Iha momentu istóriku ida ne´e, partidu Frenti-Mudança maka la partisipa. Sasin ba iha asina paktu unidade ne´e maka Provedór Direitus Umanus no Justisa, Dr. Silverio  Pinto Baptista no reprezentante Komisaun Nasionál Eleisaun,    Dra. Maria Virna Ermelinda Soares. 

Jornalista: Xisto Freitas

Foto: Reprezentante partidu polítiku sira hasai foto hamutuk ho Prezidenti Repúblika, Dr. Francisco Guterres Lú-Olo, reprezentante PDHJ no CNE hafoin asina paktu unidade. Imajen Mídia Palásiu PR.

Sem comentários: