Prezidente Repúblika Sei Fó Desizaun Finál Ba Lei Rai

DILI, (TATOLI) – Prezidente Repúblika, Francisco Guterres Lú-Olo sei fó desizaun finál (promulga) ba rejime espesiál Terras no Propriedades ou Bens Imóveis.

Lei Terras no Propriedades ne’e importante tebes ba nesesidade povu no Nasaun. Konfirmadu ona katak lei refere la-kontra Lei Inan tuir rezultadu fiskalizasaun preventiva hosi Tribunál Rekursu.

“Prezidenti anterior haruka Lei Rai ba Tribunál Rekursu atu halo fiskalizasaun preventiva, maibé Tribunál Rekursu anúnsiu katak laiha violasaun ruma ba iha Konstituisaun. Tan ne’e, Prezidente atuál kontinua halo korespondénsia ba Lei ida ne’e para halo desizaun finál”, Prezidente Parlamentu Nasionál, Aderito Hugo da Costa ba jornalista sira iha Palásiu Prezidénsia Repúblika, Bairu-Pité, Kuarta ne’e, hafoin enkontru ho Xefe Estadu.

Enkontru ne’e, alende aprezenta progresu rejime espesiál, xefe órgaun lejislativu mós ko’alia kona-ba preparasaun kampaña no eleisaun parlamentár ne’ebé besik daudaun ona.

Jornalista: Xisto Freitas | Editora: Rita Almeida

Foto: Prezidente Repúblika, Francisco Guterres Lú-Olo simu vizita husi Prezidente Parlamentu Nasional, Adérito Hugo da Costa iha Palásiu Prezidensiál Bairo-Pite Dili hodi informa serbisu parlamentu, progresu Lei ba Rai no preparasaun ba eleisaun parlamentár. mídia PR