Pemilu bukan untuk memilih yang terbaik tapi untuk mencegah yang terburuk berkuasa

(Refere ba prosesu ukun iha Nasaun Demokrátiku)

Abel Amaral*, opiniaun

Iha Nasaun Demokrátiku ne’ebé deit atu forma ukun tenke liu husi dalan eleisaun. Tanba iha Nasaun Demokratiku hotu-hotu ukun mai husi povu. Hanesan mos Timor Leste, dadaun ne’e, ita hakat liu ona eleisaun rua maka eleisaun ba leader komunitaria sira no eleisaun prezidensial. Hanesan ema Timor Oan sente orgullu tanba iha eleisaun rua ne’e bele dehan suksesu boot ba ita hotu tanba ita Timor-Oan rasik maka derije ita nia festa demokrasia ne’e.

Atu liga oituan ba pratika, eleisaun ne’e laseluk no la-let atu hili ema ruma atu kaer ukun hodi ukun rai no ukun povu. Koaze nasaun demokratiku ne’ebé deit, Sistema demokrasia ne’e diak liu ona Sistema sira seluk tanba laiha ukun nain ida maka kaer ukun ho rohan laek, hatur iha konstitusaun RDTL art.64 hateten :ema ida labele kaer kargu poltiku ida iha moris tomak, eh laiha rohan”. no laiha ukun nain ida maka hala’o ukun tuir ninia hakarak no ida ne’e mos hakerek iha konstitusaun RDTL art.2.Nu.1-2 hateten “Soberanu hatur metin iha povu, ne’ebé hala’o soberania ne’e tuir Lei inan haruka no Estadu hakruk ba Lei inan no lei oan sira”.

Ita kolia kona-bá demokrasia ita labele hanoin diak hela deit maibe demokrasia ne’e mos iha nia vantajem no iha mos nia desvantajem. Ninia vantajem maka ukun nain sira ne’e ita povu maka hili hodi kaer ukun rai no ukun ita povu, maibe ninia desvantajem maka dala ruma ema hirak ne’ebé ita hili tanba sira matenek ka tanba sira nia promesa mesak gaul-gaul deit, depois de kaer ukun, sira nia ukun latuir ita povu nia mehi. Tanba ne’e maka iha eleisaun, karik atu hili ema ruma ka hili partidu ruma atu ukun rai no ukun ita povu, la’os ita hili tanba sira nia promesa ba ita ka tanba sira nia matenek deit maibe ita hili sira para sira bele ukun diak liu ida ne’ebé kaer ukun tiha ona. Tanba iha nasaun demokratiku, ukun nain sira kaer ukun ho nia tempu. Nune’e, ita povu maka sai metre/mestra ba ukun nain sira nia ukun durante periodu ne’ebé ukun nain sira kaer ukun. Tanba hau konsidera eleisaun la/os deit it aba hili se maka atu kaer ukun maibe eleisaun mos hanesan exame/test ida ba lider sira hotu tantu sira ne’ebé maka kaer ukun tiha ona ka sira ne’ebé maka atu kaer ukun.

Ba hau eleisaun hanesan exame ida husi povu ba lider sira no kampanhe politiku hanesan aprezentasaun ida husi lider politiku sir aba povu ne’ebé hanesan sira nia mestre ka mestra. Nune’e, iha kampanhe politiku, husu bai ta povu sir abele asisite no rona ho didiak tanba kampanhe politiku ne’e mos sai sasukat id aba sira atu liu ka la liu iha eleisaun ne’ebé hanesan exame.

Iha Nasaun Demokratiku hau konsidera ita povu hanesan mestre ka mestra ba lider sira tanba ita povu maka sei fo notas ba sira depois hodi determina sira nia future ba ukun liu husi eleisaun, no ida ne’e hatur iha konstitusaun RDTL 7.1 hateten “Povu hala’o nia kbit politiku liu husi sufrajiu universal livre, direitu, sekretu no periodiku, no liu husi forma seluktan ne’ebé hakerek ona iha lei Inan”. Maibe la’os tanba demokrasia entau ita hotu ba rame-rame tuir vota, lae!!!, tanba atu tuir vota mos tenke tuir regras ne’ebé dehan ba sira ne’ebé atu tuir vota tenke iha idade sanulu resin hitu ba leten tuir konstitusaun RDTL art.47.1 hateten “Sidadun hotu-hotu ho tinan sanulu resin hitu baleten, iha direitu atu hili no ema hili nia”. Nune’e bele habadak katak tuir eleisaun la’os tuir gosta maibe tuir regras/atur main.

Sai povu iha nasaun demokratiku tenke orgullu mesmu moris sei terus ba buat oioin maibe nafatin fo biban no let atu determina moris nasaun nian iha tempu eleisaun. Tempu besik on aba ita povu hanesan mestre/mestra atu exame ba lider sira no bele fo valor ba sira durante sira nia ukun iha tinan lima nia laran. Liga ba ida ne’e, hau lembra liafuan murak ida husi matenek nain ida ho naran Franz Magnis Suseno, SJ., nia hateten “Pemilu bukan untuk memilih yang terbaik tapi untuk mencegah yang terburuk berkuasa”. Ho lian tetun karik “Eleisaun ne’e la’os atu hili ida ne’ebé mak diak maibe atu evita ema hanoin no laran att sira atu ukun”. Hanoin didiak ba nasaun nia vida moris iha ita povu nia liman, se la’os ita, se? se la’os agora, bainhira? Tanba liu husi eleisaun maka ita votu ida bele determina destinu moris familia, sosiedade no nasaun tuir ita nia hakarak. Tanba atu iha mudansa ruma iha moris uma-kain, sosiedade no nasaun persiza define liu husi ita nia partisipasaun iha prosesu dezenvolvimentu nasional, sadauk ida maka ita eleisaun ne’e rasik. tanba iha eleisaun maka ita bele hili se maka bele kaer ukun ho diak tuir ita nia hanoin no hili rasik.

Ita kolia kona-bá eleisaun iha Timor Leste, la’os buat foun ba ita, iha ne’e tuir buat ne’ebé hau hatene tanba hau akompanha iha eleisaun dala rua ka tolu liu ba, taxa partisipasaun iha eleisaun iha deferente boot. Tanba hau koko kompara ba eleisaun dahuluk 2002 no 2007 maka bele dehan koaze Timor oan hotu partisipa e bele dehan taxa partisipasaun maximu tebes. Maibe mai iha eleisaun 2012 taxa partisipasaun hahu menus no eleisaun prezidente 2017 ita hare taxa partisipasaun tun ho númeru signifikativu, ida ne’e sai problema oituan mesmu la-bot liu. Husu ba esatdu atu halo avaliasaun ida ho konprensivu hodi nune’e bele identifika saida maka sai kauza ba ita ne’e? Estadu labele husik deit tanba povu nia lian ne’e improntante ba vida moris nasaun iha nasaun demokratiku.

Iha sorin seluk, liga ba taxa partisipasaun tun kada periodu eleisaun, hau tenta identifika ba kauza ba problema refere maka hanesan tuir mai, maibe ida la’os dehan los tiha ona, lae. Ida ne’e hanoin pesoal maka hanesan tuir mai:

1. Orgaun eleitoral sira seidauk halo atualiza dadus iha baze ho lolos, nune’e ema ne’ebé mate ona dala ruma ninia eleitoral sei iha, ne’ebé ita sura eleitotal deit entau konsidera matebian sira sei iha,

2. Dala ruma orgaun eleitoral sira halo atuliza dadus, maibe informasaun husi familia ka ema seluk tan ne’ebé fo informasaun iha baze ba orgaun eleitoral ne’e maka lalos, nune’e orgaun eleitoral sira atualiza tuir deit informasaun ne’ebé maka iha.,

3. Mesmu ema iha kartaun eleitoral no kartaun eleitoral nia nain sei moris maibe tanba fila liman iha fatin seluk ka hala’o atividade moris iha fatin seluk, nia labele fila ba nia rai moris fatin tanba ho razaun oi-oin,

4. Eleitor sira iha ona esperiensia katak lider sira ne’ebé maka sira hili iha eleisaun hirak liu ba, ninia ukun la-fo satisfasaun durante kaer ukun. Pur-exemplu, promesa ne’ebé halo ba publiku molok kaer ukun, maibe depois kaer ukun, promesa hirak ne’eba hela deit naran (Helena).

5. Dalaruma maluk balu hala’o vida moris iha nasaun seluk, ka ba atividade ruma iha nasaun seluk maibe ita konsidera sira iha tanba data baze sei iha, maibe ema refere lapartisipa iha eleisaun. Nune’e husu ba ita hotu-hotu liu-liu orgaun eleitoral sira no instituisaun relevante atu bele hare asuntu elisaun no taxa partisipasaun iha eleisaun jeral tuir mai ho númeru ne’ebé serteja. Karik latuir eleisaun la’os tanba problema mensiona iha leten, depois iha eleisaun parlementar 2017 maka latuir eleisaun nia númeru sae as nafatin, ida ne’e att maka ne’e.

Obrigadu e Bem Hajam.

*Autor: Abel Amaral | Agora dadaun Kuliah iha UNPAZ, fakuldade Direitu, servisu iha Fundasaun Mahein, Email: maunabut762003@yahoo.com / abelfundasaunmahein@gmail.com

*Note: Hau iha opini ida ho nia titlu : "Pemilu bukan untuk memilih yang terbaik tapi untuk mencegah yang terburuk berkuasa". Husu ba mana/ maun redasaun atu hatun hau nia opini ida nee  iha Timor Agora nia website ka iha ONLINE. Opini ida nee nia konteudu tomak responsabilidade autor nian tanba opini nee laos reprezenta grupu ka institusaun maibe reprezenta pesoal. Atu kompletu liu bele loke iha attachment tuir mai. Maka nee deit ba servisu hamutuk lahaluha hato'o obrigadu wain.