Iha
loron-kuarta ne'e, joven ho dirijente sira hosi sosiedade sivil timoroan hatudu
ona preokupasaun ho planu foun ba polítika foun planeamentu família Timor-Leste
nian ne'ebé, entre aspetu sira seluk ne'ebé polémika, sujere katak métodu sira
ne'e fó de'it ba kaben-na'in sira.
Avansa
iha konteúdu atual, refere hosi petisaun ida no karta aberta ida ne'ebé diriji
ba primeiru-ministru, Rui Maria de Araújo, polítika sei iha "impaktu
negativu ida no sei afeta ema tomak nia direitu, liuliu joven sira, ema sira
ne'ebé la kaben ho feto sira ne'ebé iha zona rural sira".
Hanesan
ezemplu, planu determina katak feto sira bele hetan de'it asesu ba métodu
kontrasepsaun nian ka planeamentu família nian bainhira ba klínika ho sira nia
laen.
Tuir
apoiante sira hosi karta aberta, medida sira hanesan ne'e halo parte iha textu
tanba influénsia iha debate hosi dirijente relijiozu oioin.
Iha
rede sosial sira hatudu, hanesan ezemplu, imajen sira hosi debate públiku hosi
tema ne'ebé hatudu de'it relijiozu na'in rua, ida katóliku no ida protestante,
iha meza debate nian. Debate, ne'ebé la informa ba imprensa, ladún hetan
atensaun tanba halo iha tempu hanesan bainhira nasaun tomak iha atensaun ba
kampaña eleitoral.
"Planu
ne'ebé aprezenta hosi Ministériu Saúde foin lalais ne'e viola ami nia
konstituisaun, ami nia lei sira ho polítika nasional sira no akordu
internasional sira ne'ebé maka Timor-Leste promete ona halo tuir", refere
hosi karta aberta ne'e.
Ema
sira ne'ebé asina karta ne'e husu aumenta tan debate públiku kona-ba asuntu,
ne'ebé aumenta hodi "inklui perspetiva sira hosi ema tomak ne'ebé iha
interese", inklui organizasaun sira hosi sosiedade sivil.
Ba
akadémika Berta Antonieta, promotora ida hosi karta aberta, "grupu
relijiozu sira labele envolvidu iha desizaun sira hanesan ne'e hosi Estadu
nian", presiza nune'e "separasaun loloos ida entre igreja ho
Estadu".
"Feto
sira nia direitu ba asesu ba planeamentu família nian labele determina hosi
líder relijiozu sira. Labele aseita katak feto sira ne'ebé la kaben labele
hetan asesu ba planeamentu família nian ka bele simu de'it planu bainhira sira
ba husu ho sira nia laen", refere.
Loron
balun antes eleisaun lejislativa sira, Berta Antonieta, ho tinan 25, fó hanoin
ba líder polítiku sira nasaun nian katak metade hosi eleitor sira seidauk iha
tinan 30 no hanesan joven sira maka iha maioria reprezenta populasaun.
"Bainhira
sira hakarak manán, sira labele haluha joven sira. Polítika sira ne'e, asesu ba
saúde seksual no reprodutivu, hanesan kestaun sira ne'ebé importante tebes ba
ami", nia hatete.
"No
iha ema barak ne'ebé katuas-ferik maka hanoin mós hanesan ne'e, ne'ebé hatete
katak argumentu sira ne'ebé hanesan moralista liu duké kona-ba saúde públika
labele determina polítika", nia refere.
Promotor
sira hosi karta aberta insisti katak "ema tomak iha direitu ba asesu ba
planeamentu família nian, independente hosi nia tinan ka estadu sivil", no
direitu hodi hili "métodu ida planeamentu família nian" no bele
desidi "ho dalan livre, hakarak ka la'e atu iha oan, iha oan hira ka
bainhira maka atu iha oan".
Maski
Estadu timoroan tuir konstituisaun hanesan estadu laiku, todan sosial no
polítika hosi Igreja Katólika hanesan maka'as tebes ho padre sira, madre sira
ka relijiozu sira seluk partisipa maka'as iha definisaun hosi polítika sira
kona-ba tema sosial oioin, iha saúde no mós iha edukasaun.
Komisaun
Nasional ba Luta hasoru SIDA lidera hosi pastor protestante ida ne'ebé hapara
ona ho rekomendasaun ba uzu prezervativu sira, hanesan medida dahuluk ida
ne'ebé adoptadu.
Nia
prezensa iha "media" nasional sira, ho diskursu ultra konservador,
mosu beibeik ho rekomendasaun moralista sira hasoru saida maka hanesan "seksu
livre", no konsidera mós katak dansa angolanu "kizomba", ida
ne'ebé popular liu iha nasaun aziátiku, "estraga futuru hosi joven sira
ne'ebé pratika dansa ne'e".
Asesu
ba métodu sira hosi planeamentu família iha Timor-Leste kontinua susar nafatin
no marka sosial ne'ebé asosiadu ho tema impede joven barak hodi hetan konsellu
ho di'ak.
Istória
sira relasionadu ho menstruasaun sei halo nafatin iha ensinu públiku, violénsia
seksual iha nafatin no feto nia direitu sira, kona-ba seksualidade, kontinua
laiha atensaun, hatete hosi estudu ne'ebé halo iha nasaun.
SAPO
TL ho Lusa
Sem comentários:
Enviar um comentário