Autoridade: Nasaun hetan kampaña eleitoral ida ne'ebé hakmatek liu dezde sempre

Kampaña ba eleisaun lejislativu sira iha loron-sábadu ne'e iha Timor-Leste hanesan kampaña ida ne'ebé hakmatek dezde sempre iha istória nasaun nian, lahó insidente ka iregularidade todan sira, haktuir hosi autoridade polisial sira no eleitoral sira ne'ebé ko'alia ho Lusa.

"Buat hotu la'o ho di'ak tebes. Durante kampaña tomak kuaze laiha rejistu insidente sira", hatete hosi komandante hosi Polísia Nasional Timor-Leste (PNTL) nian, Júlio Hornay, ba Lusa.

"Ne'e hanesan kampaña ida ne'ebé pasífiku liu, hakmatek dezde sempre", nia garanti.

Kampaña ba votu loron-sábadu nian, ne'ebé hotu iha loron-kuarta ne'e, hahú iha loron 20 Juñu ho forsa polítika hamutuk 21 ne'ebé hanesan konkorente ba eleisaun halo asaun sira kuaze loron-loron iha fatin sira iha nasaun laran.

Iha situasaun sira ne'ebé maka karavana partidáriu sira hasoru malu maibé laiha rejistu ba problema ida.

Hornay esplika katak iha de'it relatu sira hosi insidente ki'ik ida "ne'ebé rezolve tiha ona iha minutu lima nia laran, iha Viqueque" no hosi "grupu ida joven sira ne'ebé hanesan apoiante hosi partidu ida ne'ebé maka la'o kalan iha Baucau hodi halo barullu ho motor sira".

Maski nune'e, responsável polisial esplika ona katak dispozitivu seguransa sei destaka nafatin iha fatin sira, "durante períudu tomak votasaun nian, hosi kontajen no to'o hafoin fó sai rezultadu ikus sira" hosi Tribunal Rekursu, ne'ebé sei akontese de'it iha inísiu fulan-Agostu.

"Ami mantén dispozitivu hanesan iha fatin sira, ami iha planu ida operasaun sira nian ne'ebé preparadu ba munisípiu tomak no, bainhira iha situasaun ruma, ami iha kondisaun hodi aumenta dispozitivu", nia refere.

Prezidente hosi Komisaun Nasional ba Eleisaun (CNE), Alcino Baris, hatete mós ba Lusa katak kampaña akontese ona lahó rejistu ba iregularidade todan ruma, hodi subliña katak autoridade eleitoral sira kontinua iha kordenasaun tomak ho PNTL no ho partidu polítiku sira.

"La hetan iregularidade todan ida. Fator importante maka kordenasaun maka'as ho delegadu sira iha munisípiu sira no kumprimentu nafatin hosi partidu polítiku sira", nia hatete.

"Partidu sira, maibé mós populasaun, merese parabéns. Hanesan ona esforsu ida hosi CNE dezde inísiu, ho reuniaun barak, hodi bolu atensaun beibeik ba dirijente importante sira hodi fó instrusaun sira ba militar ho simpatizante sira hodi labele viola regra sira. Ne'e iha ona efeitu pozitivu durante kampaña tomak", nia afirma.

Iha ona eleitor hamutuk 764.858 maka resenseadu hodi vota, entre sira na'in 1.101 iha Austrália, na'in 589 iha Portugal, na'in 208 iha Reinu Unidu ho na'in 227 iha Koreia-Súl.

Autoridade eleitoral timoroan sira sei instala ba votasaun lejislativu estasaun votu nian hamutuk 1.121 iha sentru votasaun nian hamutuk 859 ne'ebé pelumenus hitu sei funsiona iha estranjeiru, iha Austrália (Darwin, Sydney ho Melbourne), Koreia-Súl, Portugal ho Reinu Unidu.

Besik metade hosi eleitor sira tenki halo viajen ba fatin sira seluk iha nasaun nian iha loron votasaun nian, haktuir hosi estimativa hosi autoridade eleitoral sira.

Urna sira sei loke entre tuku 07:00 to'o tuku 15:00 oras lokal iha loron-sábadu (tuku 23:00 loron-sábadu no tuu 07:00 loron-domingu, oras Lisboa nian).

SAPO TL ho Lusa