VI Governu Diskrimina Jornalista

DILI - VI Governu neebe lidera husi Primeiru Ministru (PM), Rui Maria de Araujo komesa halo ona diskriminasaun ba jornalista sira, husi media privadu no media publiku iha Timor Leste.

Diskriminasaun nee akontese wainhira Governu foti desizaun fo deit espasu ba jornalista husi media publiku hanesan RTTL. EP (Radiu Televizaun Timor Leste, Empreza Publika) no ANTIL (Ajensia Notisiosa Timor Leste) hodi vota iha kualker fatin, maibe jornalista sira husi media privadu labele vota livre.

Durante nee esforsu KI buka meius oioin, hanesan liu husi karta hakerek no liu husi kontaktu telephone ba STAE, Ministeriu Administrasaun Estatal (MAE) no Primeiru Ministru (PM) hodi fo konsiderasaun ba jornalista ba profisionais jornalista husi media privadu sira hodi vota livre vota, maibe desizaun husi Xefe Gabinete Primeiru Ministru (PM), Lourdes DC Sanches hasai despaisu esplika baze tuir lei eleitoral artigu 41 ninia neebe hetan alterasaun ho lei numeru 9, 5 de Maiu nian sidadaun hothotu so bele vota iha fatin neebe sira halo rejistu ba.

Iha lei numeru 5, artigu 37 lei neebe hanesan fo esesaun deit ba membrus forsas armadas nian, seguransa ho fiskais kandidatura no ajente administrasaun nian mak halo votasaun ambulante movel neebe mak besik

Tuir Prezidente Konsellu Imprensa (KI), Virgilio Guterres katak, esesaun ida nee KI konsidera katak lei neebe mak Governu kria nee hatudu diskriminasaun ba jornalista sira.

“Tuir Konsellu Imprensa ninia konsidera lei nee diskriminativu tanba iha karta nee hatete, so jornalista sira neebe ke mos alende jornalista sira mos sai hanesan funsionariu publiku, ka administrasaun publika mak bele hetan tratamentu hanesan,” dehan Virgilio ba jornalista liu husi konferensia imprensa neebe halao iha edifisiu KI, Maskarinhas-Dili, Kuarta (19/07/2017).

Virgilio haktuir, ida nee implika katak, maluk sira neebe mak servisu iha RTTL.ep no servisu iha tatoli ajensia laos sira nia status hanesan jornalista, sira halao servisu jornalista maibe sira nia status hanesan funsionariu publiku.

Iha fatin hanesan, Komisariu Konsellu Imprensa (KKI), Hugo Fernandes dehan, ho desizaun ida nee, KI sente triste tanba lei neebe mak halo fo diskriminasaun ba jornalista sira tuir lolos nee aplika ba hothotu. Raimundo S. Fraga

Suara Timor Lorosae