Espetativa Transferénsia Podér

DILI, (TATOLI) - Jerasaun tuan sira sei iha, ita tenke aproveita, ita lalika hadau malu fatin ho jerasaun antiga sira, iha kontestu polítika, maibé ita koko aprende ho buat ki’ik-oan sira ne’ebé sira iha para depois fortifika ita-nia koñesimentu, ita-nia esperiénsia para momentu ruma ita bele.

Akadémiku Universidade Orientál Timor Lorosa´e (UNITAL), Alváro da Silva hato’o nia espetativa kona ba transferénsia podér ba Ajénsia Tatoli, iha nia kna´ar fatin, Kampus UNITAL, Becora, Díli, tersa (03/10).

Tranzisaun jérasionál katak depois jerasaun tuan, jerasaun foun tenke prontu ona asume estafeta governasaun nian ba oin. Atu aproveita ida ne´e, jerasaun foun sira tenke aproveita iha kontestu hotu-hotu.

“Tenke envolve aan iha serbisu sira ne’ebé mak bele fó esperiénsia ba foin sa’e sira para depois iha koñesimentu ne’ebé natoon, validade ne’ebé natoon depois ikus mai sira bele aproveita,” hateten dekanu Fakuldade Siénsia Sosiál (FSS), Álvaro da Silva.

Dekanu Álvaro akresenta, prepara aan ne´e mak liuhusi edukasaun formál sira no seluk tan. Edukasaun formál ne’ebé forma ema nia intelektuál atu koñese saida mak mosu. Segundu, esperiénsia lori ita oinsá bele hatene serbisu bainhira fó kargu ruma ka kualkér fatin ruma atu halo serbisu. “Ne’e mak joven sira tenke aproveita.”

Dekanu esplika katak ko´alia kona-ba edukasaun iha buat tolu mak importante hanesan profesór, kurríkulu no infraestrutura bázika.

Ida, ita tenke kualifika profesór sira hodi bele iha koñesimentu ne’ebé adekuadu, nune´e bele tranzmite siénsia ba labarik no foin sa’e estudante sira ho di’ak.

Daruak mak kurríkulu, tenke reflete ba karakter moris Timor-Leste nian maibé mós ita labele taka katak edukasaun ne’e komún, mundialmente.

Datoluk mak tenke hadi’a infraestrutura bázika sira. Buat tolu ne’e importante oinsa atu hadi’a ita-nia jerasaun foun sira para sira bele iha kualidade ne’ebé mak di’ak, hodi bele iha koñesimentu em termos de siénsia, esperiénsia no seluk tan.

“Simu de’it siénsia husi profesór ne’e seidauk to’o maibé ajusta siénsia ho kampu traballu para depois buat rua ne’e han malu para bele iha koñesimentu,” dekanu Álvaro realsa.

Hanesan jerasaun foun, hanesan foin sa’e, ita buka evita aan husi hahalok ne´ebé provokativu hodi kontribui ba pás no garante estabilidade hodi hala´o dezenvolvimentu.

Paz, asaun ne’e tenke mai husi ema ida-idak. Bainhira nia sente katak buat ne’ebé nia halo ladún di’ak, nia evita nia aan, la provoka buat seluk entaun pás komesa bele mosu.

Bainhira ita la hamosu dezintendimentu ho ema seluk, ita komesa ona kontribui ba pás. Estabilidade mosu husi ita-nia asaun rasik. Tanba ne’e mak joven sira, hakmatek ita-nia aan, buka kontribui ita-nia aan, envolvimentu ita-nia aan ba atividade sira ne’ebé mak lori ita ba buat di’ak kompara ho ita buka fali buat seluk ne’ebé mak la kontribui atu dezenvolve ita-nia aan. “Ne’e mak buat importante,” nia afirma.

Joven sira husi idade 16-30 buka hatene identidade. Iha momentu ida ne’e mak inan-aman sira, komunidade koloka joven sira ba buat ne’ebé di’ak para sira bele aproveita enerjia pozitiva sira ne’ebé mak iha sira-nia isin-lolon ba buat ne’ebé di’ak ba sira-nia aan.

Kuandu ida ne’e ita halo ona, pás ne’e bele mosu. Ita-nia estabilidade bele mosu. Labele hanoin katak bolu pás tanba serbisu osan iha ona, osan barak mak kontribui.

Ema hotu-hotu kontribui ba atividade ne’ebé di’ak, hanoin ne’ebé di’ak, sei kontribui ba estabilidade,” nia reforsa.

Iha fatin hanesan, estudante Universidade Nasionál Timor Lorosa´e (UNTL), Marçal Salgario hateten, atu simu estafeta lideransa husi jerasaun tuan sira, tempu oportunu agora mak hanesan joven, estudante ita tenke prepara aan, aprende no estuda barak.

Atu prienxe prosesu dezenvolvimentu, iha moris, iha kompetisaun barak tanba ne´e tenke estuda no aprende. Preparasaun ida ne´e ita tenke liuhusi prosesu aprendizajen ne´ebé mak di´ak.

Ba joven sira atu kontribui nafatin ba pás iha fatin hotu. “Buka eduka ita-nia aan, presiza aprende ho ita-nia vontade, esforsu hodi bele aprende buat ne´ebé di´ak relasiona ho ita-nia moris hodi bele promove pás.”

Jornalista: Rafy Belo | Editór: Manuel Pinto