Embaixada Portugal nian iha Díli funsiona iha instalasaun foun iha 10 Outubru

Embaixada Portugal nian iha Díli funsiona hahú loron-segunda iha nia instalasaun foun, iha sede Sporting Club Timor nia sorin no besik Palásiu Governu iha Díli, liutiha tinan tolu hafoin hahú obra sira.

Ho edifísiu rua, ida ba xanxelaria no ida seluk ba Sentru Kultural - ne'ebé sei iha Biblioteka, Sala Espozisaun nian no Auditóriu - kompleksu hosi embaixada ne'e iha área konstrusaun hamutuk 2.700 metru kuadradu no aas máximu andar rua.

Projetu hamutuk hosi empreza NLA, ho IDA-TL, obra - ne'ebé hahú iha loron 31 Maiu 2014 no iha folin hamutuk dolar millaun 3,9 - hala'o hosi empreza portugeza Ensul.

Harii iha Avenida Marginal, kompleksu ne'e nia entrada prinsipal maka fila ba Palásiu Governu no entrada serbisu nian iha rua 25 de Abril, ne'ebé iha sede BNU nian.

Mudansa ne'e fó sai iha loron-segunda iha email ida ne'ebé haruka ba komunidade portugeza hosi embaixador Portugal nian iha Díli, Manuel Gonçalves de Jesus - ne'ebé besik hakotu ona nia mandatu, hodi sei ba xanxelaria iha Seul.

Koreia eletróniku ne'e refere katak embaixada sei taka entre loron 05 no 09 Outubru ba mundansa. Seidauk iha loron markadu ba inaugurasaun ofisial.

Hahú fulan-Abril 2000 maka xanxelaria dahuluk hosi embaixada funsiona iha edifísiu ne'ebé pertense ba Asosiasaun Komersial, Agríkola ho Industrial Timoroan nain (ACAIT), ne'ebé instaladu mós delegasaun ida hosi BNU ne'ebé sai mós hanesan sede hosi Koreiu Timor-Leste nian.

Instalasaun hosi xanxelaria nian iha edifísiu ACAIT uluk hanoin atu sai hanesan temporáriu, ho objetivu, iha tinan 2000, atu instala embaixada iha edifísiu antigu hosi kámara komersial xineza nian.

Tuir dalan formal, embaixada bele loke de'it iha fatin ne'e hafoin restaurasaun independénsia, iha 20 Maiu 2002, maibé uza ona iha tinan 15 ikus ne'e.

Liutiha tempu balun, Governu timoroan fó ba Portugal fatin ne'ebé harii ona embaixada foun - plaka "futuras instalações" kleur ona maka sai hanesan sinal úniku ba edifísiu foun nian.

Sinal dahuluk hosi kompleksu ne'e lansa iha loron 21 Maiu 2012 hosi Prezidente portugés iha tempu ne'ebá, Aníbal Cavaco Silva, ne'ebé vizita Timor-Leste iha aniversáriu ba dasanuluk hosi restaurasaun independénsia nian.

SAPO TL ho Lusa