BOAMP garante sei la hapara Funsinariu Kontratadu; OR finansia ba estrutura membru Governu

Bloku Opozisaun Aliansa Maioria Parlamentar (BOAMP) garante Funsionariu Kontratadu (FK) sira sei la hapara husi sira-nia servisu tanba konsidera orsamentu duo désimu sei bele atu fasilita, hateten prezidente bankada PLP Fidelis Magalhães ba jornalista, liu hosi konferensia imprensa iha Parlamentu Nasional, Kuarta (13/12/2017).

“Ami husi AMP sei asegura sira kontratadu sei simu osan, no ami mós assegura katak sei iha renovasaun ba funsionariu sira nia kontratu, tanba ne’e responsabilidade governu nian, se governu selebra ona kontratu ate agora, tanba governu labele halo estensaun ba nia kontratu ba tan tinan oin, depois orsamentu dua désimu nato’o para atu asegura parlamentu, ba funsionariu sira ne’e, tanba ne’e labele prejudika ita nia funsionariu sira nia vida, sira nia família nia moris, tanba de’it interesse polítiku,” hateten Fidelis.

Iha biban hanesan, prezidente bankada CNRT, Arão Noe, reforsa, Orsamentu Retifikativu la’os atu trata saláriu ba funsionariu sira, maibe atu finansia de’it estrutura governu foun no selu kompromisu kontratu ho kompañia sira.

“Ba funsionariu kontratadu ka permanente, simu osan husi orsamentu jeral estadu tinan 2017 nian, depois sira simu hosi bens servisu ba funsionariu kontratadu, tuir lei jestaun finanseira artigu 32, kuandu orsamentu jeral estadu ba tinan 2018 seidauk aprova, selu funsionariu sira, bens servisu funsionariu sira, liuhosi dua désimu, tanba ne’e, sira ne’ebé kontratadu mós iha direitu hanesan, tanba alokasaun dua désimu ne’e, bazeia ba orsamentu tinan kotuk nian, ita iha 1.3 millõesn dólar, dividir ba 12, governu jere 130 millões kada fulan, para hodi halo jestaun ba estadu nia moris, durante orsamentu jeral ba tinan 2018 seidauk hetan aprova, tanba ne’e laiha razaun governu atu hapara funsionariu kontratadu sira, se opsaun polítika ida atu hapara sira, ida ne’e mak ami lamenta, tanba ita labele prejudika povu funsionariu sira, tanba opsaun polítika ida, hau husu para governu konsidera ida ne’e, tanba ita labele sakrifika ema rihun resin nia destinu, tan de’it ita nia interese polítika,“ esplika Arão.

Reprezentante povu ne’e sujere ba VII governu konstitusional, atu labele tau funsionariu sira-nia moris iha risku tanba de’it interese polítika.

Antes ne’e, Ministru Prezidensia Konsellu Ministru, Adriano do Nascimento, deklara ona ba públiku katak, sei hapara hotu funsionariu kontratadu iha Timor laran, bainhira remata tinan 2017.

Enkuantu, Primeiru Ministru, Marí Alkatiri mós antes ne’e deklara katak, Estadu sei iha osan ne’ebé natoon atu bele halo eleisaun antesipada.

Hapara FK kompetensia KFP

Nune’e mós, Ministru Turizmu, Manuel Vong,  hateten, kona-ba atu hapara Funsionáriu Kontratadu  (FK), nia parte labele foti desizaun tanba desizaun kona ba funsionariu sira ne’e kompentesia Komisaun Funsaun Publiku (KFP) nian.

“Atu hala’o servisu Ministerio nian la’o diak no susesu ne’e , presija ema tanba ne’e ,  ema sira ne’ebé mak servisu iha MT ne’e hamutuk atus rua resin, no husi atus rua resin ne’e nain 90 resin lima deit mak funsionariu permanente no nain atus ida resin ne’e funsionariu kontratadu, no atu hapara ou kontinua ne’e kompetensia KFP nian,”Ministru Turismu Manuel Vong hateten ba GMN iha Centro Convenções de Dili, Tersa (12/12/2017).

Diretor  Nasional Administrasaun Rekursus Humanus, Ministerio Turismu, Leandro Sena,  afirma, karta hapara kontratu ba funsionario kontratadu refere, nudar prosesu normal ne’ebé la’os foin akontese maibe  antes ne’e akontese ona iha governu anterior.maibe oinsa atu hapara ou kontinua ne’e konforme superior Ministerio nian.

“Ita iha funsionariu hamutuk atus rua resin, no husi númeru ne’e kontratadu mak barak liu númeru permanente ne’ebé  karik hapara duni sira kontratu, ne’e sei afeta ba servisu ministeriu nian tanba ema laiha, maibe prontu ida ne’e desizaun husi superior ministeriu nian nomós KFP,” DNARH ne’e dehan.

Entertantu Aurio da Costa, funsionariu Kontratadu, Ministeriu Turizmu, sente triste ho karta ne’e tanba bele afeta ba nia vida moris.

“Ha’u hanesan funsionariu kontratadu ne’ebé haknaar-an iha ne’e durante tinan rua ona, konserteza sente  triste, tanba se hapara kontratu ne’e sei afeta ba iha ha’u-nia vida moris, entaun ha’u husu ba Ministru atu bele hato’o ba Governu oinsa tetu opsaun ne’e, tanba la’os ha’u mesak deit mak sei lakon servisu maibe mós ba Timor oan lubuk ida ne’ebé mak durante ne’e  hala’o servisu ho estatutu kontratu,” Aurio hateten.

Tuir Observasaun iha terenu nota katak, maske   kuaje diresaun hotu-hotu iha Ministeriu refere, hetan ona informasaun kona ba asuntu ne’e, maibe maioria funsionariu  kontratadu sei hala’o servisu hanesan bai-bain. say/Ola

GMN TV | Grupo Média Nacional