Solusiona Inserteza Politika, Lu Olo Deside Eleisaun Antesipada?

DILI - Destinu VII governu konstitusional no Bloku Opozisaun Maioria Parlamentar iha Prezidente Republika (PR), Fransisco Guterres Lu Olo nia liman, karik dalan uniku ba PR mak liu husi eleisaun antisipada atu bele solusiona inserteza politika iha rai laran.

Tuir Abano Rakambia nuudar membru Frente Dezenvolvimentu Demokratiku (FDD), fiar katak Bloku Maioria Parlamentar (BOP) sei lasimu VIII Governu gratuita, kuandu laliu husi eleisaun antisipada maibe prosesu hotu iha PR nia liman. Nunee mos parte koligasaun Fretilin no Partidu Demokratiku (PD) mos sei lakohi entrega VIII Governu tau iha bandeza hodi entrega ba BOP nia liman, kuandu laliu husi prosesu ruma.

"BOP mos sei lakohi simu VIII Governu konstituisional gratuita deit nunka liu husi prosesu ruma, nunee mos laos fasil ba governu koligasaun atu fo gratuita deit ba sira, maibe laiha dalan seluk, dalan uniku maka liu husi eleisaun antisipada neebe karik PR deside tuir konstituisaun,” tenik Albano ba  STL iha nia rezidensia Quintal-Boot Dili Sabadu, (23/12/2017).

Nia mos sublina ouituan kona ba deklarasaun Premeiru Ministru (PM) Mari Alkatiri dehan “Opozisaun maka monu maibe Governu sei lamonu”.  Ida nee hanesan deklarasaun politika no parte seluk mos Alkatiri nia karakter maka hanesan nee maibe ema diak. Mezmu Alkatiri nia deklarasaun kroat maibe demokratiku no direitu atu hatoo deklarasaun politika ruma.

"Ba ami nia haree katak parte BOP mos sei lasimu VIII Governu ho gratuita no laliu husi prosesu ruma nunee mos parte koligasaun mos hanesan sei lakohi tau deit VIII Governu tau iha bandeiza hodi fo gratuita deit ba BOP. Maibe dalan diak maka eleisaun antispada maibe buat hotu iha PR nia liman no ita hein,”nia kualia.

Iha fatin ketak, Diretor Kumpania Bobveni Lda Epifanio Faculto dehan nuudar ema emprezariu Timor oan atu governu neebe deit hanesan. Mezmu governu koligasaun maka kaer governu ou BOP mak kaer governu hanesan deit, maibe importante liu maka governu tenke valorize ema Timor oan no valoriza mos emprezariu sira atu kontribui ba dezenvolvimentu.

Nia mos sublina ouituan kona ba deklarasaun PM Alkatiri katak governu la monu maibe opozisaun mak monu. Ba kestaun nee, nia parte konsidera normal tanba nuudar ema politiku. No tuir nia tuir lolos konfliktu politika hotu ona, maibe tanba deit lider partidu idak-idak ba ho nia ambisaun atu ukun ida nee maka kestaun, halo povu no emprezariu sira mak sai vitima ba politikus. Tanba nee diak liu PR anunsiu ona atu partidu politiku sira prepara an ba eleisaun antisipada hodi solusiona problema rai laran.

Nunee mos Observador Politika husi Universidade Nasional Timor Lorosae (UNTL) Camilo Ximenes dehan atu foti dezisaun ba elisaun antisipada ka lae nee iha kompetensia PR nia liman tuir dalan legal konstituisaun neebe iha, no seidauk tempu atu partidu seluk halo konsolidasaun ba militantes.

Nia dehan tan katak, iha lider partidu politiku balun halao uluk tuir politika neebe sira iha. Maibe seidauk iha dezisaun husi PR. Nunee mos PR atu foti dezisaun ruma tenki bazeia ba lei konstituisaun neebe iha, agora tuir lolos governu sei iha tempu ba nia dala ida tan atu lori nia programa dala ida tan ba parlamentu nasional atu halo diskusaun no aprovasaun. 

Justinho Manuel | Suara Timor Lorosae