Horta: Prezidente Republika Maka Sei Halo Desizaun

DILI - Eis Prezidente Republika Jose Ramos Horta hateten, Prezidente Republika tuir konstituisaun iha prazu limiti hodi foti desizaun ruma neebe atu hatun Governu ida nee, atu fo pose ba Governu foun ou atu konvoka eleisaun antisipada nee 22 Janeiru, tanba nee Xefi Estadu maka sei halo desizaun.

“Hau semana lubuk ida ona hau lakolia ho Prezidente Republika, hau mos lakoi enkomoda nia bebeik, hau lahatene Xefi Estadu nia hanoin saida, maibe tuir hau nia hatene nia hakarak estabilidade, nia hakarak regras demokratika, tanba nee Prezidente Republika maka sukat didiak buat sira nee hodi hodi halo desizaun,” dehan Eis PR Horta, ba jornalista sira, bainhira partisipa iha selebrasaun natal hamutuk, ho jornalista sira, iha rezidensia PM, Farol, Dili, Kuarta (27/12/2017).

Eis aman nasaun nee mos koalia ho korpu diplomatiku hotu iha laran no iha Nova Yorke konaba situsaun politika neebe oras nee lao iha rai laran, no semana-semana halo relatoriu konfidensial ba misaun lubuk ida inklui Amerika.

Entretantu konaba situasaun iha rai laran tuir eis Xefi Estadu nee hateten, Situasaun diak  tanba povu neebe hela iha aldeia, iha suku, iha Munisipiu povu rasik hatene situasaun hakmatek, tanba povu rasik joven sira lahalo problema.

Iha fatin hanesan Primeiru Ministru Mari Alkatiri hateten, Prezidente Republika maka hatene deside bainhira nee ho Prezidente Republika Francisco Guterres Lú Olo, sira seluk maka husu fali lae, sira manan eleisaun lai laos ho 8 deputadu hakarak sai Primeiru Ministru, dehan PM Mari. 

Carme Ximenes/Maria Lay | Suara Timor Lorosae