DILI, (TATOLI) – Jornalista
sira tenke iha sentidu kirítiku hodi hetan informasaun di’ak atu bele divulga
ba públiku, nune’e povu bele hakmatek mezmu situasaun polítika Timor-Leste mak
nune’e.
“Jornalista sira tenke kontinua
nafatin sentidu krítiku maibé partisipa nafatin hodi lori povu hakmatek
nafatin, tanba situasaun Timor-Leste mak akontese iha rai balun bele hamosu ona
buat ruma”, Primeiru Ministru, Marí Alkatiri, hato’o bainhira Natal hamutuk ho
jornalista sira iha nia Rezidénsia Farol, kuarta (27/12).
Mídia nia papél importante atu
emite informasaun ba sosiedade, tanba ne’e tenke iha sentidu kirítiku hodi lori
povu hakmatek maibé povu iha ona maturidade di’ak tanba durante Natal laiha
asidente ruma akontese, laiha barullu, mezmu joven nain lima mak kapturadu, ne’e
hanesan prevensaun de’it.
“Kuandu jornalista mak la iha
sentidu kirítiku, di’ak liu buka servisu seluk”, hateten nia. Enkuantu, ema
hotu hatene katak mídia importante tebes iha sosiedade nia laran tanba bele
halo interasaun entre sosiedade ho ukun nain sira no mídia bele sunu no bele
hamate ahi.
Hatutan: “Obrigadu ba
instituisain mídia sira tanba to’o agora bele kontribui nasaun to’o ohin loron
mezmu situasaun polítika difisil tebes iha nasaun Repúblika Demokrátika
Timor-Leste (RDTL) tanba povu iha ona maturidade atu hakalma-án hodi kontribu
ba estabilidade nasionál”.
Nune’e mós povu nia maturidade
boot liu lideransa sira no sei buka dalan atu rezolve situasaun polítika
Timor-Leste.
Xefe Ezekutivu ne’e dehan governu
ida ne’e sai fatin ba solusaun no la’os sai fatin ba problema tanba ne’e
garante katak sei la iha problema. Maibé mídia sira iha responsabilidade boot
tebes atu hatun mensajen ba povu tomak.
“Ita boot sira mak lorloron iha
kontaktu direta ba povu, enkuantu mídia sosiál dadaun ne’e ema uza barak liu
maibé ita sei buka dalan atu regula tanba iha vida tenke iha regra tanba kuandu
la iha regra bele halo konfuzaun barak”, hateten.
Entretantu, buka dalan regula
mídia sosiál atu Timor-Leste mós bele la’o ba oin di’ak liu ho demokrásia
ne’ebe metin.
Jornalista: Zezito Silva | Editora:
Rita Almeida
Imajen: Primeiru-Ministru, Marí
Alkatiri, bainhira selebra Natal hamutuk ho jornalista sira iha nia rezidénsia
Faról Dili, kuarta, (27/12). Foto António Goncalves
Sem comentários:
Enviar um comentário