Prevensaun, investigasaun no punisaun hosi violénsia hasoru feto sei difisil - Investigadór

Maski autoridade timor-oan sira halo esforsu, maibé sistema atu prevene, investigasaun no punisaun hosi violénsia kontra feto, liu-liu violénsia doméstika, kontinua sai nu’udar perigu ida iha Timor-Leste, tuir saida maka investigadora dehan ba Lusa. 

“Sistema prevensaun, punisaun no investigasaun ( hosi violénsia kontra feto) kontinua difisil”, tenik Naiara Alves, kordenadora-adjunta hosi Observatório dos Países de Língua Oficial Portuguesa (OPLOP) ba Lusa. 

Tuir investigadora ne’e, “dezigualidade jéneru maka sai hanesan preokupasaun ba Estadu Timór, liu-liu violénsia doméstika ne’ebé nu’udar violasaun grave hosi relatóriu Nasoens unidas ( ne’ebé analiza situasaun refere to’o 2011)”.

“Iha 2010 kria ona lei ida kontra violénsia doméstika, hodi investiga hahalok kriminál, maski feto sira lahato’o keixa, nune’e mos fó penalizasaun no reedukasaun (hosi laen/parseiru/namoradu)”, tenik investigadora OPLOP, ligadu ba Universidade Federal Rural do Rio de Janeiro (UFRRJ).

Ba Naiara hosi área Istória, “ida ne’e hanesan sistema ida ne’ebé difisil no laheten vítima hira ona”.

Naiara Alves hateten katak, tanba falla iha sistema ne’e maka ezisti “mekanismu justisa informál”, hanesan linxamentu públiku.

“Ladun iha komunikasaun no artikulasaun entre entidade oioin ne’ebé hateten vítima hosi violénsia doméstika”, hatutan.

Tuir kordenadora OPLOP, “relasaun jéneru iha Timor-Leste tenke sai nu’udar komprensaun istórika no sosiolójika ida hosi sosiedade ne’e. Sei domina ho perfil tradisionál, hosi família bot ne’ebé agrikultura subsisténsia sei bazeia ba maundeobra familiár”.

“Sosiedade ida ne’ebé maioria rurál, sosiedade tradisionál ida ho sistema kasta nomós aliansa familia nian. Kazamentu maka hanesan papel importante iha relasaun entre família”, hatutan tan.

Tuir Naiara Alves, "dinámika ne’e, kuotidianu liu, hodi fó implikasaun bot ba relasaun jéneru, inklui atualmente".

“Iha sosiedade ne’e, ezisti distinsaun entre papel feto no mane nian. Dinámika sosiál ne’e mos sai hanesan fatór ne’ebé ladi’ak ba organizasaun Estadu nian, tanba Estadu direitu presiza iha igualidade jéneru ba hothotu, nomós fó oportunidade hanesan”, dehan tan.

Tuir kordenadora OPLOP, "iha imajinároi sosiál, sexist no patrisiál ne’eb’e sei akontese iha sosiedade timor-oan maka, feto halo liu serbisu doméstika, maski iha ona realidade foun katak feto sira mos tenke serbisu hodi ajuda sustenta sira-ninia família".

Investigadora ne’e dehan tan katak feto sira ladun eskola barak iha Timor-Leste no halo parte iha merkadu serbisu nian maka sai hanesan desvantajen bot, no hatutan tan katak relatóriu ida hosi ONU (2014) fó sai diferensa bot entre saláriu feto no mane nian.

"Tuir relatóriu ONU nian katak hosi tinan 1990 to’o 2003 feto ladun halo parte iha merkadu fomál tanba feto sira ladun hetan asesu ba edukasaun iha ensinu sekundária nomós ensinu superiór", nia hatutan.

Investigadora ne’e hateten katak “dezigualidade ekonómika, entre riku ho ki’ak, maka fó impaktu bot ba feto sira iha zona rurál duke ba mane sira.

Ladun hetan informasaun, ladun hetan asesu ba saúde no violénsia doméstika ka iha uma laran maka hatuun feto sira-ninia-aan”.

Naiara Alves dehan tan katak ladun iha asaun afirmativa governativa hosi feto iha sosiedade nomós merkadu serbisu nian.

Independénsia Timor-Leste nian, hahú hetan rekoñesimentu hosi mundu internasionál iha 2002, hafoin tinan 500 hosi kolonializasaun portugés, domíniu indonézia (entre 1975 to’o 1999) enomós hosi governu tranzisaun Nasoens Unidas Unidas (1999 to’o 2002).

Iha 28-novembru-1975, Frente Revolucionária do Timor-Leste Independente (Fretilin) deklara independénsia, maibé lakleur de’it, tanba invazaun indonézia hahú akontese iha 7-dezembru-1975.

SAPO TL ho Lusa