PPN Paraliza Funsionamentu PN

DILI, (TATOLI) – Bankada Opozisaun Aliansa Maioria Parlamentár konsidera Prezidente Parlamentu Nasionál (PPN), Aniceto Guterres paraliza funsionamentu Parlamentu tan de’it ta’uk enfrenta pratika demokrátiku.

Tuir Aliansa Maioria Parlamentár (AMP), Aniceto ta’uk ba mosaun destituisaun, ne’ebé AMP submete hodi hatún Aniceto hosi kargu PPN tanba konsidera la imparsiál bainhira hala’o knaar.

“Prezidente Parlamentu Nasionál paraliza ona funsionamentu normal Parlamentu Nasionál liuhosi impede sesaun plenária, ne’e sei sai lisaun aat ba lideransa jerasaun foun iha futuru,”  deputada bankada Partidu Libertasaun Popular (PLP), Signi Candrawati fó sai liuhosi deklarasaun iha konferénsia imprensa, ohin iha Parlamentu Nasionál.

Tuir Signi, AMP sei la tolera asaun PPN nian, tanba tuir AMP devia PPN hatuur interese estadu as liu duke interese privadu ou ambisaun polítiku hodi mantein podér.

Tuir artigu 50 nú 2 rejimentu PN suspensaun ba sesaun plenária labele liu loron sanulu, nune’e mós bainhira  atu suspende hikas sesaun plenária sira tenke liu hosi deliberasaun PN rasik.

Enkuantu PPN dezvia husi plenária normal ne’e hahú kedan husi fin de Novembru 2017, la’ós ida ne’e de’it, PPN mós ignora atu halo konvokatória konferénsia lideres bankada hodi aprova ajenda sira atu halo debate iha plenária.

“Sesaun plenária iha inísiu tinan 2018 importante tebes tanba deputadu sira presiza hato’o asuntu importante sira ligadu ho situasaun iha laran atu povu bele hatene situasaun no nu’udar órgaun soberanu daruak tuir los Prezidente Parlamentu Nasionál mós tenke aproveita sesaun plenária iha inísiu tinan foun hodi félísita povu”, nia argumenta.

Entretantu tuir komunikadu husi Gabinete Prezidente Parlamentu, sesaun plenária labele realiza tanba laiha ajenda fiksa Ordem do Dia nian ba plenária normal ida.

Jornalista: Julia Chatarina | Editór: Manuel Pinto

Imajen: Prezidente Parlamentu Nasionál (PPN), Aniceto Guterres