CNRT Husu PR Fó Segundu Mais Votadu Forma Governu

DILI, (TATOLI) – Líder Partidu Kongresu Nasionál Rekonstrusaun Timor (CNRT-sigla portugés) husu Prezidente Repúblika (PR), Francisco Guterres Lú Olo, atu fó oportunidade ba partidu mais votadu (CNRT) daruak forma oitavu Governu Konstitusionál.

“Hosi CNRT sujere katak karik bele PR fó fiar ba partidu segundu mais votadu atu teste hamutuk ho AMP (Aliansa Maioria Parlamentár) iha Parlamentu atu estabelese Oitavu Governu”, Prezidente Konsellu Diretiva Partidu CNRT, Dionísio Soares Babo, ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin enkontru ho Prezidente Repúblika kona-ba inpase polítika.

Babo dehan sira sei tenta menus hosi fulan rua ka fulan ida atu kompleta rekezitu hotu-hotu (Lei Orgánika Governu) kona-ba estabelesimentu oitavu governu.

Eis governante ne’e garante bainhira entrega ba partidu segundu mais votadu forma Governu, programa no orsamentu sei pasa iha Parlamentu Nasionál.

Iha fatin hanesan, Xefe Bankada CNRT, Arão Noé de Jesus, hateten inisiativa Prezidente Repúblika konvoka enkontru ho partidu polítiku hodi rona partidu sira nia hanoin ne’e di’ak teb-tebes tanba ida ne’e Konstituisaun nia mandatu.

“Desizaun saida de’it maka Prezidente Repúblika foti ne’e kompeténsia eskluziva Prezidente nian. Katak, desizaun iha rua, ida dissolve Parlamentu no ida seluk demite Governu”, katak.

Tuir Arão, antes foti desizaun, Prezidente Repúblika tenke haree ba nia konsekuénsia sira. “Opsaun Demite Governu hodi fó CNRT forma oitavu governu, ne’e dentru fulan ida ka rua de’it.

Maibé, opsaun ba eleisaun antesipada, presiza fulan haat ka lima maka foin iha solusaun, satán Estadu ida ne’e moris sein Orsamentu Jerál Estadu 2018 nian”, argumenta.

Jornalista: Xisto Freitas | Editora: Rita Almeida

Imajen: Líder Partidu Polítiku CNRT enkontru ho Prezidente Repúblika, Francisco Guterres Lú Olo, ohin iha Palásiu Prezidente Nicolau Lobato, hodi buka solusaun ba inpase polítika iha rai-laran. Foto Antonio Goncalves