ONG Oras Nee Iha Situasaun Frajil, Presiza Lei

DILI - Diretor Ezekutivu HAK Manuel Monteiro Fernandes deklara oras nee sosiedade Sivil iha Timor Leste moris iha situasaun frajil. Tanba relasiona ho deklarasaun husi Eis-Ministra Finansas neebe deklara katak ekonomia iha TL diak ona.

Ami sosiedade sivil agora dadaun iha situasaun ida neebe mak frajil tanba, enkuantu eis-ministra finansa deklara ba publiku katak ekonomia TL nia sae tiha ona ba 4-6%.  Ida halo ema doadores sira hahu dada an kedas mai TL entaun sira hahu fali halo sira nia aijuda ba nasaun seluk neebe presiza suporta,”dehan Manuel Monteiro ba STL iha nia servisu fatin Farol Dili Tersa, (23/1/2018).

Tuir Deklarasaun husi Prezidente Funsaun Publika Faustino Cardoso katak kuandu laregula funsionariu mak sei lori risku ba estadu nia finanseiru, ida nee tuir Manuel Monteiro nia hanoin katak dalan diak maka parte governu presiza kondisaun neebe diak atu ema beele loke empregu rasik.

Situasaun ekonomia nee halo ema hotu tenki mai iha Dili atu beele hetan fatin servisu iha ONG no Governu tanba laiha ona dalan seluk ba sira atu loke servisu rasik ida nee maka halo dezempregu iha TL sai as. Dezempregu as tanba deit parte seitor privadu sira laprodutivu. Tanba ema komunidade kestiona nafatin konaba Estrada no merkadu.

Antonio Cunha Vise Retor-III Institute of Business (IOB) dehan katak governu liu husi funsaun publika kuandu halo rekrutamentu ba oin presiza bazeia ba lei funsaun publiku neebe iha. Atu nunee ema neebe atu sai funsionariu publiku tenki iha kualidade servisu diak no professional. 

Justinho Manuel | Suara Timor Lorosae