Semana ne'e Bruxelas simu diálogu polítiku dahaat entre UE ho Timor-Leste

Delegasaun timoroan ida ne'ebé lidera hosi ministru Estadu ho Konselleiru ba Seguransa Nasional, José Ramos-Horta, partisipa iha semana ne'e, iha Bruxelas, iha diálogu polítiku dahaat entre UE ho Timor-Leste.

Diálogu polítiku dahaat kalkula "enkontru sira ne'ebé hanesan nível aas tebes ho autoridade europeia sira hodi nune'e hatudu rekoñesimentu ba dalan ne'ebé maka joven nasaun timoroan halo dezde nia independénsia, liuliu iha domíniu ba respeitu ba demokrasia", hatete hosi delegasaun europeia, liuhosi komunikadu, iha Díli.

Delegasaun timoroan, ne'ebé halo viajen ba Bruxelas akompaña hosi embaixador europeu nian iha Díli, Alexandre Leitão, inklui mós José Neves, visi-ministru hosi Edukasaun ho Kultura, Manuel Mendes, diretór-jeral hosi Floresta, no elementu tékniku sira hosi gabinete Primeiru-Ministru nian no hosi Ordenador Nasional ba Fundu Europeu Dezenvolvimentu nian.

Organiza iha ámbitu hosi Akordu Cotonou, asina entre UE ho Estadus sira Áfrika, Karaíbas ho Pasífiku, diálogu polítiku inklui enkontru ida, iha loron-tersa, ho reprezentante importante sira hosi UE ba Polítika Externa no Seguransa nian no visi-prezidente hosi Komisaun Europeia, Federica Mogherini.

Iha loron 25 previstu enkontru ida ho komisáriu europeu ba Koperasaun Internasional ho Dezenvolvimentu, Neven Mimica.

José Ramos-Horta hetan mós konviti hodi diriji ba Komisau Negósiu Estranjeiru hosi Parlamentu Europeu, iha loron 23, no ba Reprezentante sira hosi Estadu-membru sira UE nian iha Komité Polítiku no Seguransa iha loron 28.

"Delegasaun timoroan sei iha oportunidade hodi troka ideia ho instituisaun tolu hosi UE, Konsellu, Parlamentu Europeu ho Komisaun", haktuir hosi komunikadu ne'ebé fó sai iha findesemana.

Akordu Cotonou ko'alia kona-ba realizasaun regular hosi "enkontru sira entre UE ho Estadu parseiru sira ho objetivu fahe informasaun sira, avalia prosesu sira koperasaun nian ne'ebé hala'o hela, promove komprensaun di'ak ho fasilita estabelesimentu hosi prioridade sira ne'ebé iha ona akordu no ajenda ne'ebé fahe ona".

Enkontru ikus hosi diálogu polítiku hala'o ona iha Díli iha fulan-Juñu tinan 2016.

SAPO TL ho Lusa