Opozisaun timoroan, maioria iha
Parlamentu Nasional, hein katak Prezidente Repúblika anunsia iha semana ne'e
solusaun ida ba difikuldade polítika ne'ebé maka Timor-Leste hasoru daudaun,
hodi hili formasaun ba Governu foun ida ka eleisaun antesipadu.
"Di'ak liu labele husik
kleur atu nasaun kontinua ho dúvida ", hatete hosi Arão Noé, xefe hosi
bankada Congresso Nacional da Reconstrução Timorense (CNRT), partidu boot hosi
partidu opozisaun tolu, ba Lusa.
Arão Noé ko'alia iha Parlamentu
Nasional - ne'ebé iha loron-segunda ne'e la hala'o tan sesaun plenáriu ruma -
iha loron ne'ebé maka kumpri ona fulan neen dezde eleisaun hosi deputadu atual
na'in 65 no ne'ebé maka bainhira xefe Estadu bele, hodi desidi, sobu Parlamentu
no konvoka eleisaun antesipadu.
Fonte hosi Prezidénsia timoroan
hatete ba Lusa, iha semana liubá, katak Francisco Guterres Lu-Olo sei simu
partidu polítiku sira iha loron-tersa, iha loron-kuarta rona Konsellu Estadu,
nune'e iha semana ne'e sei iha posibilidade ba anúnsiu hosi desizaun ida.
Timor-Leste, iha fulan barak nia
laran, hasoru hela períudu polítika ne'ebé laloos ho opozisaun, maioria iha
Parlamentu Nasional, xumba programa Governu nian no proposta ida hosi Orsamentu
Retifikativu, no aprezenta ona proposta ida sensura nian ba ezekutivu no
proposta ida hodi hatún prezidente parlamentu nian.
Opozisaun - ne'ebé harii hosi
deputadu na'in 35 hosi Congresso Nacional da Reconstrução Timorense (CNRT),
Partidu Libertasaun Popular (PLP) ho Kmanek Haburas Unidade Nacional Timor Oan
(KHUNTO) no halibur hamutuk iha Aliansa Maioria Parlamentar (AMP) ida ne'ebé
harii hafoin formasaun Governu - defende katak Prezidente tenki konvida sira
hodi harii Governu alternativu ida ba Governu atual.
Frente Revolucionária do
Timor-Leste Independente (Fretilin) ho Partidu Demokrátiku (PD), ne'ebé halo
parte iha koligasaun Governu nian, ne'ebé halo mós parte ema independente
balun, militante na'in ida hosi CNRT no na'in rua membru anterior hosi PLP,
hasai hosi partidu hafoin aseita hodi halo parte iha ezekutivu, konkorda ho
eleisaun antesipadu.
Iha nível Parlamentu Nasional,
previzaun maka iha loron-tersa deputadu sira sei halibur iha plenáriu, ho
ajenda ne'ebé sei marka de'it ho deklarasaun polítika sira no "asuntu sira
seluk ne'ebé relevante".
Tuir esplika hosi Arão Noé, sei
diskuti mós guiaun ba debate ba proposta sensura hosi opozisaun hasoru Governu
- ne'ebé maka prevista hala'o entre loron 31 Janeiru to'o loron 02 Fevereiru,
maibé nia realizasaun bele limitadu ho desizaun ruma hosi xefe Estadu.
Fonte hosi ezekutivu konfirma mós
ba Lusa katak iha posibilidade atu Governu haruka, iha semana ne'e nia laran,
ba Parlamentu Nasional versaun daruak hosi programa Governu nian
"anotadu".
Sei ajenda mós iha Parlamentu
Nasional proposta rua hosi opozisaun hosi kombate hasoru korupsaun, liuliu
"rejimi jurídiku hosi responsabilidade penal ba krimi korupsaun nian iha
área privadu" no "rejimi responsabilidade penal ba titular sira hosi
kargu públiku".
Importante ba funsionamentu hosi
Estadu tomak - Timor-Leste iha daudaun sistema duodésimu dezde loron 01 Janeiru
- hanesan autorizasaun ida hodi hasai hosi Fundu Petrolíferu hodi selu konta
públika sira to'o aprovasaun hosi Orsamentu Jeral Estadu nian ba tinan 2018.
SAPO TL ho Lusa
Sem comentários:
Enviar um comentário