quinta-feira, 10 de maio de 2018

Igreja TL Asina Tan Akordu Subvensaun Annual Ho Sétimu Governu


DILI, (TATOLI) – Prezidente Konferénsia Episkopál Timor-Leste, Don Basílio do Nascimento ohin, Kinta (10/05) asina akordu ida ho governu hodi define kona-ba atribuisaun hosi governu ba Igreja Timor-Leste hanesan subvensaun annual ho total orsamentu $15 millions.

Bispu Dioseze Baukau, Don Basílio do Nascimento esplika, akordu ne’e hanesan akordu annual ne’ebé mak parte igreja ho governu asina kada tinan-tinan.

 “Asinatura ne’e loloos hanesan akordu anuál ida ne’ebé tinan-tinan tenke asina, maibé tinan ida ne’e atraza tanba  situasaun polítika ne’e duni laiha biban, no foin ohin mak bele asina akordu ba tinan 2018 nian,” Bibi Atan Don Basílio do Nascimento informa ba jornalista sira iha Palásiu Governu, ohin.

Akordu ne’e nu’udar parte ida atu subliña implementasaun hosi kompromisu Estadu Vatikanu no Estadu Timor-Leste nian, liu-liu kona-bá kontribuisaun ne’ebé mak Estadu Timor-Leste fó ba atividade uma kreda iha Timor-Leste.

“Implementasaun hahú ona no kontribuisaun ne’e mai taka buat ne’ebé mak iha ona, importante mak uma kreda tenke presta konta konaba kontribuisaun ne’ebé Estadu fó ba uma kreda,” Don Basílio esplika tan.

Tuir Bispu Baukau, Estadu no uma kreda hanesan parseiru ba servisu povu nian, tanba  ne’e Estadu partilla ho uma kreda responsabilidade konaba servisu povu nian, liu-liu ba buat ne’ebé uma kreda laiha kbiit. Estadu sei kontribui konforme posibilidade durante tinan ida ba servisu Igreja halo ba sosiedade.

Parte seluk, Sekretáriu Estadu Konselhu Ministru no Komunikasaun Sosiál, Matías Boavida hateten akordu ne’ebé ohin asina iha Konsellu Ministru (KM), atu atribui parte Estadu liuhosi governu nia ba Episkopál hodi hala’o atividade Igreja.

“Primeiru-Ministru no Prezidente Episkopál asina akordu atu define atribuisaun parte governu ba Episkopál ba subvensaun anuál ho valor US$15 millions ne’ebé iha relasaun ho tinan finanseiru 2018. Buat hirak ne’e atu hala’o atividade sosiál, edukativa no ecclesial,” Matias Boavidada informa.

Jornalista: Julia Chatarina | Editór : Manuel Pinto

Imajen: Prezidente Konferénsia Episkopál, Dom Basílio do Nascimento no Primeiru-Ministru, Marí Alkatiri asina akordu anuál hodi fo kontribuisaun Estadu ba atividade Igreja. Imajen GPM/Samuel

Sem comentários: