quinta-feira, 10 de maio de 2018

Kuaze observador 3.200 maka akompaña lejislativu iha loron-sábadu


Kuaze observador na'in 3.200, na'in 171 hanesan internasional, sei namkari iha Timor-Leste, iha findesemana ne'e, hodi akompaña eleisaun lejislativu antesipadu loron-sábadu, ne'ebé konkore forsa polítika ualu.

Informasaun hosi Sekretariadu Tékniku hosi Administrasaun Eleitoral (STAE) ne'ebé maka Lusa hetan hatudu katak rejista ona observador timoroan hamutuk 3.010 hodi akompaña votasaun, parte balun halo parte iha misaun sira hosi nasaun sira seluk hanesan hosi embaixada sira Austrália ho Estadus Unidus nian.

Austrália hanesan nasaun ida ne'ebé iha observador barak liu, hamutuk atus resin, fahe entre misaun sira hosi embaixada nian iha Díli no hosi universidade oioin, ho delegasaun sira ne'ebé halo parte mós observador timoroan sira.

Hamutuk, rejista ona entidade ka organizasaun hamutuk 19 ho ekipa sira hosi observador sira iha Timor-Leste, grupu boot sira (iha ema na'in 49 tuir grupu ida) hosi Embaixada Austrália no hosi Australian Timor-Leste Election Observation Mission (ATLEOM), hosi Embaixada Estadus Unidus nian (na'in 42), hosi Victoria University (na'in 36) no hosi International Republian Institute (na'in 14).

Entre delegasaun sira, iha mós observador na'in hitu hosi embaixada Japaun nian, na'in haat hosi Embaixada Méxiko, Nova Zelándia ho Tailándia no na'in tolu hosi Uniaun Europeia, no hosi embaixada Bangladexe, Filipina ho Portugal.

Entre observador sira, iha mós delegasaun sira hosi IFES (International Federation for Electoral Systems), hosi Komisaun Nasional Eleisaun nian (CNE) tailandeza, hosi Searth Foundation, hosi Plataforma Internasional hosi Jurista sira ba Timor-Leste (IPJET).

Iha nível nasional, iha delegasaun hamutuk 23 ne'ebé akreditadu no observador na'in 3.000 resin, no númeru boot liu maka hosi Observatóriu hosi Igreja ba Asuntu Sosial sira (OIPAS) - ne'ebé iha observador na'in 937 -, hosi Fundasaun Halibur ba Dame (na'in 819) no hosi Sentru Desk (na'in 429).

Informasaun sira hosi STAE konfirma mós katak rejista ona hodi akompaña asaun eleitoral jornalista internasional na'in neen - hosi ajénsia Lusa, Nikke, AP ho Kyodo - no na'in 265 ema timoroan, ne'ebé grupu boot (na'in 108) hosi televizaun no rádiu públiku sira (RTTL).

Sei iha mós fiskal rihun resin hosi forsa polítika ualu ne'ebé maka akompaña votu no fahe iha sentru sira votasaun nian no iha estasaun sira votu nian.

Destaka iha sentru sira votasaun nian maka fiskal hamutuk 5.392, na'in 5.392 hosi Frente Revolucionária do Timor-Leste Independente (Fretilin), na'in 1.726 hosi Frente Dezenvolvimentu Demokrátiku (FDD), na'in 794 hosi Partidu Demokrátiku (PD) ho na'in 534 hosi Aliansa Mudansa ba Progresu (AMP).

Iha estasaun sira votu nian, sei destaka fiskal hamutuk na'in 9.506, grupu boot hosi AMP (na'in 4.139), tuir Fretilin (na'in 2.222), FDD (na'in 1,634) ho PD (na'in 1.511).

Partidu sira ho númeru fiskal sira ne'ebé ki'ik maka koligasaun sira MSD ho MDN, no PEP, númeru dahuluk iha boletin votu nian, la rejista fiskal ida.

Kuaze fiskal hamutuk 2.500 maka sei akompaña votasaun iha Díli.

Kampaña eleitoral hotu iha loron-kuarta ne'e no iha loron rua reflesaun nian antes halo votasaun.

Besik eleitor rihun 787 maka rejista ona no bele ba vota entre tuku 07:00 iha loron-sábadu (hora lokal) to'o tuku 15:00, iha estasaun votu hamutuk 1.151, fahe hosi sentru votasaun hamutuk 876 no instala iha suku hamutuk 452 iha nasaun laran.

Eleitor sira iha estranjeiru bele vota mós iha Austrália (Darwin, Melbourne ho Sydney), iha Koreia-Súl (Seul), iha Portugal (iha Lisboa ho Porto) no iha Reinu Unidu (iha Dungannon, Londres ho Oxford).

Iha estranjeiru, fatin votu loke iha períudu hanesan - tuku 07:00 to'o tuku 15:00 - iha oras tuir fatin ida-idak nian.

SAPO TL ho Lusa

Sem comentários: