quinta-feira, 10 de maio de 2018

PNTL Investiga Militante Parpol Provokadór


DILI: Polísia Nasionál Timór Leste (PNTL) halo hela investigasaun ba militante sira husi partidu polítiku ne’ebé provoka situasaun durante períodu kampaíña polítika nia laran.

Komandante Jerál PNTL, Komisáriu Júlio da Costa Hornay hatete, kona-ba akontesimentu iha Makadiki, problema entre militante sira ne’ebé husi kampaíña eleisaun AMP nian depois fila maka mosu insidente hodi rezulta ema balun kanek no karreta balun nia vidru nakfera.

Hafoin akontese, Polísia hamutuk ho forsa armada halo kedas atuasaun hodi entrega ba eskuadra Watulari para halo investigasaun ba suspeitu balun.

“Suspeitu agora daudauk ne’e provizóriu ita sei investiga hela na’in lima, depois ita sei husu tuir nafatin, se balun nia kolega sira sei iha ita sei bolu tan nafatin”, dehan nia, hafoin soru-mutu ho Prezidente Repúblika, iha Palásiu Prezidensiál Bairru-Pité, horisehik.

Akontesimentu Lospalos

Entretantu, kazu iha Lospalos nian mós hanesan, Polísia kaer ona suspeitu ba tama iha sela. Labarik ho katuas ida kanek tanba militante ida hemu tua lanu ba tuda ema nia-uma.

Polisia kaptura ona suspeitu ne’e hodi hatama ba sela hodi prosesu investigasaun. Nune’e, vítima nia kondisaun agora ne’e halo tratamentu hela iha ospitál.

Mantein Kampaíña Pás

Haree ba insidente hirak ne’e, PNTL husu ba povu Timor tomak atu hamutuk nu’udar asegura nafatin pás no estabilidade iha prosesu kampaíña eleisaun to’o ba anúnsiu rezultadu.

Akompaña nafatin prosesu iha ambiente pás nian atu bele apoiu ba prosesu dezenvolvimentu ba rai ida ne’e.

“Hamutuk ita hadomi nafatin estabilidade no pás, nune’e ita nia rai doben Timor-Leste ne’e bele hakmatek nafatin no prosesu dezenvolvimentu la’o hanesan mós rai seluk”, tenik nia.

Bainhira remata militante sira la presiza ba karavana husi Tasi-Tolu to’o ba fali Bekora, kampaíña hotu fila ida-idak ba ninia uma hakmatek iha uma.

Polísia sira sei halo patrulla iha dalan sira hodi haree, karik kampaíña remata maka ema balun sei badiu hela iha estrada laran sei la’o ba la'o mai dada motór iha dalan, Polísia sei halo atuasaun sei haruka fila ba uma.

“Ami husu ba militante hotu-hotu povu doben Timor-Leste, liuliu iha kapitál Dili ne’ebé partisipa kampaíña AMP no FRETILIN ninia atu kampaíña remata husu imi hotu-hotu nia kontribuisaun fila ba uma nonook hakmatek”, hateten nia.

Nune’e, Prezidente Repúblika, Francisco Guterres ‘Lú-Olo’, fó orientasaun nafatin ba PNTL atu mantein nafatin servisu seguransa hodi kontrola situasaun nune’e kampaíña ne’ebé hela rohan ona ne’e bele la’o ho di’ak.

Alende ne’e mós Prezidente Repúblika mós husu atu hato’o mensajen ba povu TL tomak, liuliu joven sira kampaíña hahú iha dia 9 Abríl to’o 8 Maiu, hotu-hotu hatudu maturidade polítiku asegura didi’ak la’o husi inisiu to’o mai ohin laiha insidente boot ruma.

Apezar estementu polítiku husi na’in ulun partidu polítiku sira insulta-malu maka’as, maibé povu sira tenke mantein nafatin pozisaun hatudu maturidade polítika.

Cristina Ximenes | Independente

Sem comentários: